Las partidas ch'il HCD gioga ils ultims dis sa sumeglian. Gia encunter Lugano manava la squadra grischuna cun 2:0 – a la fin ha il HCD pers il gieu en la lutga da penaltis. Ed era encunter Ambri manava la squadra indigena cun 2:0, ed a la fin ha il HCD da digerir ina sconfitta da 2:3. Sper il glatsch ha ins il sentiment ch'il HCD smetta da dar hockey il mument nua ch'els èn en avantatg.
Finamira da terminar la qualificaziun en ils top quatter
Suenter ch'il Club da hockey da Tavau aveva cuntanschì la qualificaziun directa per ils playoffs, ha l’equipa prendì en mira da terminar la qualificaziun en ils top quatter. Quai vuless dir ch'ins ha il dretg da chasa en las partidas da playoff. Enstagl da far in pass en questa direcziun, resta il HCD dentant suenter la sconfitta cunter Ambri sin plazza tschintg. La schanza da far tuttina anc il pass tranter las meglras quatter equipas ha Tavau gia la gievgia saira. Lura spetga il duel encunter ils ZSC Lions ch’èn rangads sin plazza quatter. Per finir dat il HCD alura anc il gieu cunter Kloten.
Las ulteriuras partidas
- Losanna – Lakers 3:2
- Zug – Friburg 4:2