El è in zic il bab da la scena da freestyle a Laax ed el ha er persequità ils svilup ch’il sport ha fatg ils ultims onns e decennis. Oz è il Laax Open in dals pli gronds events da freestyle dal mund. A gnanc in autra occurenza è il dumber da topatlets e topatletas uschè grond sco a l’occurenza sin il Crap S. Gion.
Entras quests events è Laax vegnì enconuschent sin l’entir mund. E quai per exact questa cultura da freestyle.
Il Laax Open cuzza dapi intgins onns l’entir’emna ed ha in budget da 2,8 milliuns francs. Sche Reto Poltera guarda sin la grondezza, lura saja el cuntent. Bler dapli glieud na pudess l’event betg cumportar. Durant il final en la mesapipa la sonda saira èn numnadamain 12'000 persunas da la partida. Ma tuttina emprovan l’organisatur e ses team adina da chattar innovaziuns. Per exempel quai che pertutga tribunas tar la mesapipa. «Actualmain avain dretg e sanester da la pipe ina tribuna. Ma mia visiun fiss d'avair tribunas che manain er en l’arrivada. Uschia ch’i guardass ora sc’in stadion da ballape».
160 voluntaris e voluntarias – senza els na funcziunassi betg
Ils voluntaris e las voluntarias dal Laax Open èn in mix da persunas da l’entir mund. Senza ellas ed els na funcziunass l'event sin il Crap Sogn Gion betg. Da la Germania, Pologna, China, Stadis, Canada e natiralmain er da la Svizra vegnani per gidar da metter sin pe in dals pli gronds events da freestyle dal mund.
Laax è il meglier lieu dal mund.
L’atmosfera saja caracteristic per Laax, raquintan plirs voluntaris e voluntarias. In dals voluntaris è er il Sursilvan Beat Dermont ch’è per l’emprima giada da la partida sco gidanter sin il Crap Sogn Gion. El saja part da l’equipa da te e haja da purtar te a persunas ch’èn l’entir di en il fraid.
Igl è propi bel cun tschels voluntaris e voluntarias. Jau tutg tar ils seniors ma nus avain blers discurs e quai è propi empernaivel.
Mintgin dals rodund 160 voluntaris e voluntaris ha ses job u perfin plirs. Ils ins ruschnan atras la mesapipa per che lezza resta adina tuttina buna, tschertas fan controllas d'entrada ed aunc ina giada auters gidan da bajegiar si u giu l'infrastructura.
Voluntaris e voluntarias da l'entir mund
-
Bild 1 von 3Legenda: Voluntaria da Canada RTR
-
Bild 2 von 3Legenda: Voluntari dal chantun Turgovia RTR
-
Bild 3 von 3Legenda: Voluntari da Schiers RTR
Elia D'Antuono fa fin 60 telefons e var 22'000 pass a di
Muments ruassaivels datti actualmain strusch tar il manager d'events da 26 onns Elia d'Antuono. Elia D’Antuono è al Laax Open il schef dals side events – pia per tut quai che n’ha betg da far direct cun il sport. Uschia è el responsabels per ils concerts, per las partys, per ils dj’s durant las concurrenzas u era per discussiuns da podi ch’i dat durant il Laax Open. El è trasora sin il trot, trasora sin telefon, trasora en contact cun ils collegas da lavur u voluntaris. Il schef è en barat cun persunas ch'èn vid bajegiar si infrastructura u installar illuminaziuns. In credo d’Elia D’Antuono en mintga situaziun: restar lucs e calms.
Sche 160 persunas lavuran tenor in plan che ti has mess ensemen, èsi fallà da far da gnervus. Perquai èsi da restar lucs e sch’i dat problems èsi da prender peda ina minuta e studegiar in plan.
Gia dapi quatter onns è il giuven da Siat en Surselva gia responsabel per ils events a l'ur dal Laax Open. El viva era empauet ses siemi, di el. Organisar tals events saja simplamain insatge fitg bel, er sch'i dovria magari pacienza.
- 26 onns
- Creschì si ed abita a Siat
- co-fundatur ed eventmanager tar LAAX art+culture (Arena Alva)
- Dapi quatter onns responsabels per ils sidevents dal Laax Open
Lungs dis da lavur
L'emna dal Laax Open saja mintg’onn puspè in’emna extraordinaria cun dis da lavur fitg lungs – munta cumenzar baud la bun’ura fin viaden en la notg. Ma malgrà ils dis intensivs po el er magari giudair quels dis. I saja bi da vesair co ils plans ch’ins ha fatg ils davos mais, vegnan realisads. Munta: Las tribunas en il «village» a la staziun a val da Laax Murschetg vegnan construidas, las illuminaziuns e boxas installadas ed ils concerts u las partys che han finalmain lieu.
Per Elia D'Antuono na va il Laax Open betg a fin sonda notg cura che tut las concurrenzas èn terminadas. Na, il schef dals sidevents sa ruassar sch'i va bain davent da glindesdi saira, cura che tut è rumià ed il davos furnitur ha bandunà Laax. Lura haja el quatter dis liber e possia ruassar. E durant quest dis libers na prendia el er betg giu telefons.
Il siemi da daventar profi dad aissa
Per davantar in di profi da snowboard dovri ina massa trenament. Il Minisguard ha accumpagnà ils dus fragliuns Lénnie e Tiamé da Trin durant in di sin pista ed en halla, nua ch’els han trenà lur trics per la proxima concurrenza ad Adelboden. Ed els dus han anc survegnì inqual tip d’in anteriur profi.