Las cursas da skeleton, u meglier ditg, las cursas en il chanal da glatsch dal Cresta Run tranter San Murezzan e Schlarigna èn cursas criminalas. Mo ils megliers atlets da skeleton rivan senza bottas en l’arrivada a Schlarigna. Ils curridurs dal Cresta Run èn agens, perquai na vulan els era betg vegnir congualads cun skeletonists. Els dian che far cursas en il Cresta Run e skeleton en ina bobera èn duas differentas chaussas.
Dapi 140 onns tradiziun en Engiadin'Ota
Il Cresta Run è l’emprim chanal da glatsch dal mund. L’onn 1884 ha schuldada englaisa purtà il sport en l’Engiadin'Ota. Per divertiment han els cumenzà ad ir cun ina schlitta cun il chau ordavant giu dad in chanal da glatsch. Il sport da skeleton era naschì. Be in onn pli tard ha quai dà per l’emprima giada cursas en il chanal da glatsch dal Cresta Run, ed anc ina giada in zichel pli tard han ins cumenzà cun las emprimas cursas da Grand National, vairamain il champiunadi mundial dals atlets da skeleton en il Cresta Run.
Alexandros Kefalas – curridur indigen dal Cresta Run
Anc ozendi è la lingua uffiziala en il chanal da glatsch tranter San Murezzan e Schlarigna englais. Be paucs atlets u atletas indigens fan part a las cursas en il Cresta Run. Ils skeletonists activs da l’Engiadin'Ota, sco per exempel la giuvna Sara Schmied da Schlarigna fa quest sport en ina bobera, sco la bobera da San Murezzan. Mintgatant fa dentant er in indigen part al club exclusiv che fa sias cursas sin il Cresta Run. Uschia insatgi era Alexandros Kefalas da Champfèr. L’atlet entant betg pli activ ha suenter sia carriera sin il Cresta Run era fatg cursas da skeleton en la bobera ed è stà per la Grezia als Gieus Olimpics da Sotchi 2014.