Pardubice suonda al HCD en il final da la Cuppa Spengler. Als Tschecs èsi gartegià da volver la partida cunter il Team Canada en las ultimas minutas dad in 1:3 ad in 4:3. Radil, Kaut e Paulovic han tutgà aifer 3'17'' per Pardubice. Il gol decisiv per la squadra tscheca è crudà 39 secundas avant la fin da la partida.
Per ils Canadais ha Grant sajettà dus gols. Uschia sto il victur da record vinavant spetgar sin ses 17avel titel a la Cuppa Spengler.
HCD batta Frölunda
Il Club da Hockey da Tavau stat per l'emprima giada dapi il 2012, damai dapi 11 onns, en il final da la Cuppa Spengler. Ils giugaders da Tavau han dentant procurà per blera tensiun, cun laschar egualisar il club svedais Frölunda paucas minutas avant la fin dal temp regular al 3:3. En la prolungaziun hai lura mo duvrà 51 secundas, enfin ch'il giugader da rinforzament svedais Henrik Haapala ha marcà il gol a la victoria da 4:3.
En tut ha la partida tranter il HCD e Frölunda procurà per blera variaziun. Ils da Tavau han manà 1:0 e 3:2, ed ils Svedais tranteren cun 2:1. Ils gols per il HCD en il temp regular han marcà Calle Andersson (5'), Dennis Rasmussen (24') ed Enzo Corvi (36').
