Cumenzà aveva tut en l’equipa da las dunnas da Schlarigna. La giuvna Evelina Raselli da Poschiavo ha cumenzà en Engiadin'Ota cun il sport da hockey. Da là è quai i vinavant tar l’equipa da las dunnas dal HC Lugano. Ed en il Tessin ha la hockeyana grischuna alura era festivà ils emprims titels da campiunessa svizra. A Lugano è ella madirada ad ina giugadra da tschep.
Bronz olimpic, tschintg titels cun Lugano
Sin livel internaziunal ha Evelina Raselli procurà cun l’equipa naziunala ils onns 2012 e 2014 per furora. Tant tar il campiunadi mundial 2012, sco era tar ils Gieus Olimpics dal 2014 a Sotchi ha ella gudagnà cun l’equipa naziunala la medaglia da bronz. Il medem mument ha ella era pudì festivar success cun l’equipa da las dunnas dal HC Lugano. Totalmain tschintg giadas è la Grischuna vegnida cun Lugano campiunessa svizra.
Emprima staziun a l’ester Brynäs, uss Boston
Gia durant la stagiun 2019/2020 ha Evelina Raselli dà hockey a l’ester: en Svezia. L’equipa da Boston Pride è uschia la segunda staziun da la hockeyana da 29 onns a l’ester. Per in mez onn, quai è la durada dal campiunadi en l'America dal Nord, fa ella midada a Boston. Da ses patrun da lavur ha la sportista survegnì congedi. Suenter la stagiun po ella puspè turnar en ses biro da lavur. Durant il temp che Evelina Raselli fa midada a Boston èn alura er anc ils Gieus Olimpics a Peking. Per Raselli gia ils terz gieus. Era pervia da questa gronda finamira ha ella decidì da midar en la meglra liga da hockey da las dunnas – la liga nordamericana.