Jau hai il cletg che mes corp è constituì uschia ch’jau na stoss betg far bler per restar fit anc en quels onns.
Auter che Raphael Diaz (36 onns) u Simon Moser (33 onns), resta Andres Ambühl ina part da l’equipa naziunala da hockey che dat a partir da venderdi, ils 13 da matg, il campiunadi mundial a Helsinki e Tampere en la Finlanda. E per l’emprima giada vegn Ambühl a manar l’equipa svizra sin in glatsch sco chapitani, e quai cun 38 onns.
Sustegn per ils giuvens
Tenor il trenader naziunal Patrick Fischer duai Andres Ambühl - ch'è daventà il favrer per la segunda giada bab - surpigliar responsabladad e surtut sustegnair ils giuvens per che quels daventian plaunet giugaders-clav.
La finamira sto adina esser da gudagnar il titel, uschiglio ès en il fallì lieu.
Ses emprim campiunadi mundial ha Andres Ambühl dà l'onn 2004 en la Tschechia. Uss spetga ses 17avel turnier. La finamira saja da turnar a chasa cun il titel ni almain ina medaglia, uschia Ambühl. La davosa giada che la Svizra ha gudagnà ina medaglia, quella d’argient il 2018 a Kopenhagen, mancava Ambühl. Il giugader da record ha pia anc in quint avert.