L’aura ha fatg in stritg tras il quint als organisaturs dal Giro d’Italia. L’etappa ch'avess stuì vegnir partida a Livigno e ch'avess manà ils ciclists sur il Pass da l’Umbrail a Santa Maria e da là vinavant giu da la val en il Tirol dal Sid è vegnida scursanida. Pervia da las nauschas cundiziuns da l’aura sin il Pass da l’Umbrail han ils organisaturs decis da manar ils ciclists cun l'auto sur il pass ed alura da partir per la 16avla etappa davent da Prad en il Tirol dal Sid. Uschia passan ils ciclists dal Giro d’Italia be cun l'auto la Val Müstair.
Tadej Pogacar dominescha il Giro d’Italia 2024, e la blera naiv la situaziun sin il tetg da la cursa da quest onn, sin il Pass dal Stelvio. Pervia da la blera naiv sin il pass ch'è 2’757 meters sur mar aveva la direcziun dal Giro decis avant paucs dis da betg far la ruta sur il Stelvio en il Tirol dal Sid, mabain da sviar la cursa sur il Pass da l’Umbrail e la Val Müstair en il Tirol dal Sid. Sin la distanza totala da la cursa n'avess questa midada strusch gì in'influenza. Ils ciclists avessan gì da far be in pèr kilometers pli pauc che quai ch'els avessan gì da far sin il traject original. Ussa na passan els insuma betg tras il Grischun – almain betg sin lur sellas dal velo.
Sfidas e sforzs supplementars
Pront fiss il Grischun entant stà per il spectacul, malgrà sfidas supplementaras. L'Uffizi da construcziun bassa aveva bain gia avant cumenzà a rumir la naiv sin il pass da l'Umbrail. Rumir cumplettamain la via sin termin, dumonda lura tuttina varsaquant sforz. E sforzs supplementars aveva era la Polizia chantunala fatg. Quella aveva mobilisà persunal supplementar uschia ch'ella avess pudì garantir la segirezza sin il traject dals 18 kilometers ch'il Giro d’Italia avess fatg tras il chantun Grischun.
In a revair en Val Müstair
Gia l’onn 2017 aveva il Giro d’Italia, la segund gronda cursa da velo dal mund, fatg ina visita en Val Müstair. Lura dentant avevan ils ciclists fatg il viadi cuntrari. Avant set onns han els stuì ir si dal Pass da l’Umbrail. L’arrivada da l’etappa da lezza giada era a Bormio en la Valtellina. La 16avla etappa dal Giro d’Italia dal 2017 vegn bain anc ad esser en memoria ad inqual ed inquala causa il stop nunusità dal leader da la cursa Tom Dumoulin. A Santa Maria en Val Müstair aveva Dumoulin stuì far ina pausa da tualetta pervia d'ina grippa dal magun. Pervia da quest stop era ses avantatg sin ils concurrents sa sminuì per duas minutas. A la fin aveva Tom Dumoulin dentant tuttina pudì salvar ina mesa minuta avantatg sin Nairo Quintana ch'era lezza giada vegnì segund dal Giro d’Italia.
