La via al profi da skis è lunga e dira. E vegn anc in pau pli dira, en quest mument ch'ins vegn franà da blessuras. Schabegià a Gino Stucki da Flond. Gist sia emprima stagiun en il cader B da Swiss Ski ha el manchentà. Empè dad ir da cursa a cursa ha il Sursilvan stuì ir da medi tar medi e terapeuts. Avant in onn ha ses dies cumenzà a far mal. La finala ha Gino Stucki stuì terminar la stagiun senza avair fatg ina solia cursa.
Onn dolurus en plirs reguards
La primavaira 2023 ha Gino Stucki pudì guardar enavos sin ina stagiun cun buns resultats ch'han purtà ad el in plaz en il cader B da Swiss Ski. Plain plaschair e motivaziun ed ambiziuns è el sa preparà durant la stad sin la nova stagiun. L'atun ha il dies dal spezialist da slalom e slalom gigant cumenzà a far mal, ed il mal na vuleva betg chalar. In mal ch'è vegnì dad in stgarp en l'artg d'orsal. Insatge ch'ins aveva gia constatà l'onn 2021 tar l'atlet. Betg senza dubis, ha Gino Stucki laschà operar la fractura.
Igl è stà grev. Ma insaco stos dumagnar e chattar tia via
Il fatg che Gino Stucki ha pers in'entira stagiun da skis è stà fitg frustrant per il giuven da 22 onns. Cursas da la Cuppa europeica e da la FIS, ch'el fiss era stà a la partenza, n'haja el betg pudì persequitar l'ultim enviern. I faschevia memia mal. Insumma saja stà grev da chattar la motivaziun per insatge. Gino Stucki ha stuì emprender d'avair pazienza. Quai che ha la finala gidà el tras l'operaziun ed ils mais da rehabilitaziun è stà la gronda amur per il sport da skis.
In grond rir sur l'entira fatscha
La fin d'avust ha Gino Stucki finalmain puspè pudir montar ils skis ed ir sin pista. E cumenzar cun las preparativas per la nova stagiun. Ses cor ha fatg sigls dal plaschair. Ed el haja gì l'entir di in grond rir en fatscha. Dentant po el puspè trenar cumplainamain. Quai che manchia anc in pau, la confidenza, puspè star 100% sin ils skis. Cun ils collegas d'equipa na vul il spezialist da slalom e slalom gigant anc betg sa cumparegliar memia fitg. El vul far pass per pass. Survegn era anc in pau temp dals trenaders avant che far sias emprimas cursas en la stagiun nova. Cuntanscher sia furma sco avant ch'il dies ha franà el sin sia via ensi, quai è ses giavisch.
