Per la naziunala svizra da ballape è il campiunadi d’Europa en Germania ì a fin suenter in crimi encunter l’Engalterra. Malgrà in’ulteriura grondiusa prestaziun han ils Svizzers la finala pers la lutga da penaltis encunter ils «Three Lions». Ina pitra terrada, nagin happy end. L’equipa da Murat Yakin manchenta uschia, sco gia avant trais onns, da cuntanscher per l’emprima giada in mezfinal ad in grond turnier dapi 100 onns ed uschia scriver in nov capitel istorgia da ballape. Al davos campiunadi d’Europa avevan ils Svizzers pers en il quartfinal la lutga da penaltis encunter la Spagna.
Pers e tuttina gudagnà
Malgrà la trumpada, ils Svizzers dastgan esser loschs da lur prestaziuns a quai turnier. L’equipa da Murat Yakin è ina da paucas naziuns ch’ha persvadì dal tuttafatg. E quai fa surstar. Avant in mez onn funcziunava anc pauc en l’equipa, la critica gronda, il credit pitschens per quest campiunadi d’Europa. Mo la Svizra è creschida ad ina unitad. L’atmosfera entaifer il team è grondiusa, la chemia constat. Mintgin accepta sia rolla, mintga cumbatta per mintgin e mintgin è vegnì da clamar giu a quai turnier sia meglra prestaziun pussaivla - ina gronda fermezza. La Svizra ha giugà fitg disciplinà, concentrà ed er sch’i ha dà in u l’auter sbagl è l’equipa stada ruassaivla. Ed a la fin è il trenader naziunal in dals gronds victurs. Murat Yakin ha persvadì cun sia tactica, ha adina chattà il dretg recept, ils dretgs pleds.
Tut ha constà dad A fin Z
Cun giugar pari encunter ils Tudestgs, e quai en Germania notabene, cun eliminar a moda suverana il defensur dal titel l’Italia en l’otgavelfinal e cun tener pitg, gie per part schizunt dominar ils Englais, in dals gronds favurits, ha la Svizra mussà ch’ella è buna da batter mintgin. La Svizra ha persvadì sco equipa. Mo la prestaziun gist dal capitani Granit Xhaka che dirigia quai entir ensemble merita il predicat sensaziunal. Er il defensur Manuel Akanji, la figura tragica en la lutga da penaltis encunter ils Englais, ha briglià e demonstrà ch’el tutga tranter ils megliers defensur en l’Europa. Laud va dentant era a tut ils auters, davent da Ruben Vargas fin a Remo Freuler.
Sin la dretga via
La Svizra ha procurà las davosas emnas per gronda euforia da ballape, en Svizra ma er en Germania sch’ins guarda las paradas da fans tras las differentas citads. La naziunala ha gudagnà in’entira naziun davos ella. La via constat, er en questa constellaziun cun il trenader naziunal Murat Yakin e cun engaschar il trenader assistent Giorgio Contini. Sco pitschna naziun pudain ed astgain sa legrar sin ils proxims onns, ils proxims turniers. En be dus onns spetga numnadamain gia il proxim campiunadi mundial en ils Stadis Unids, en il Mexico ed en il Canada.
