Fabiana Mottis - Contract da profi tar las campiunessas da Stuttgart

Quai n'ha il Grischun anc mai gì. Ina giugadra da ballarait che survegn in contract da profi en l'exteriur. Daventà realitad per Fabiana Mottis da Lostallo en la Mesolcina. Ella ha suttascrit in contract da dus onns en la Bundesliga, tar Stuttgart. Avant trais onns è ella stada l'emprima Grischuna ch'è daventada campiunessa svizra. E quai gist en si'emprima stagiun da profi tar Neuchâtel. Cun be 18 onns ha ella gì bandunà il Grischun e sia famiglia per filar vid sia carriera da ballarait. E quai tar la meglra equipa da ballarait da la Svizra. Cun Neuchâtel ha ella gudagnà numerus titels. Vegnida trais giadas campiunessa svizra, gudagnà trais giadas la cuppa svizra ed era trais giadas il Super-Cup. E proximamain, avant che bandunar il club e laschar cuntinuar sia carriera en la Bundesliga, cumbatta ella anc cun Neuchâtel en la seria da final per in ulteriur titel da campiunessa svizra.

Fabiana Mottis ha entant 21 onns. La libera, sco il libero vegn numnà en il sport da ballarait da las dunnas, ha fatg ina carriera rasanta. Igl è chapaivel ch'ella vul far il proxim pass cun ses talent. Dacurt ha ella suttascrit in contract da dus onns tar Stuttgart. Ch'i gartegia uschè svelt da chattar in'equipa, betg be x-ina equipa, mabain in top-team en la Bundesliga, è stà ina pulita surpraisa per Fabiana Mottis. Las giugadras da Stuttgart èn las actualas campiunessas tudestgas da ballarait, han la stagiun passada gudagnà il triple ed èn era questa stagiun en il final e cumbattan per il titel da campiunessas.

Inqual mument en la carriera da Fabiana Mottis...

Ella dovria uss quella nova sfida en l'exteriur. Tar Neuchâtel avevi ella ses plaz fix. Tar Stuttgart stoppia ella mussar prestaziun e cumbatter per vegnir en il ravugl da las giugadras da tschep. L'equipa da la Bundesliga engaschia anc ina segunda Libera. Encunter lezza vegn Fabiana Mottis a sa duellar en la proxima stagiun per minutas sin il plaz. Ella sa legria sin questa sfida, tant pli che ses nov trenader tar Stuttgart saja persvadì da ses talent e ses potenzial.

Fabiana Mottis, ch'è naschida a Lostallo, en ina famiglia narra da ballarait, ha sia carriera ch'è ida rasant e be en ina direcziun, ensi. Davart da Swiss Volley vegn attestà a la Grischuna las qualitads ed il talent da daventar in superstar. Fabiana Mottis è fitg pretensiusa cun sasezza. Ella è conscienta ch'ella è anc relativ giuvna ed ha anc numerus onns per sa sviluppar. La Bundesliga saja uss ina giada si'emprima staziun en l'exteriur. Ses siemi è dentant d'in bel di pudair giugar en l'Italia, che tutga tar las meglras ligas da ballarait dal mund. Per adina puspè sa motivar sajan siemis impurtants, di Fabiana Mottis che studegia sper il sport professiunal giurisprudenza.

Fabiana Mottis è engraziaivla per tut quai ch'ella ha emprendì e pudì cuntanscher cun l'equipa da Neuchâtel. Era sche l'emprim onn, lunsch davent da chasa, da la famiglia, en in nov chantun, ina nova lingua, in nov club, in nov gimnasi na saja betg stà uschè simpel. Ma cun sia avertadad e mentalitad è ella svelt s'integrada, ha chattà ses plaz e cun abitar en ina WG era emprendì magari svelt il franzos. Fabiana Mottis na vul uss anc betg pensar al prender cumià. Avant han ella e sias Neuchâteloises anc ina missiun. Batter en la seria da final (best of 5) Kanti Schaffhausen e festivar in ulteriur titel da campiunessas svizras da ballarait, tge che muntass lu era gist il triple en questa stagiun.

RTR Sport

Avrir la box Serrar la box

Tut las istorgias da sport chattais Vus qua.

Tut ils videos da sport chattais Vus qua.