- La naziunala svizra ha gudagnà avant 41’676 fans a Köln ses emprim gieu da gruppa encunter l’Ungaria cun 3:1.
- Per ils gols svizzers han Kwadwo Duah e Michel Aebischer procurà avant la pausa sco er Breel Embolo en las davosas minutas dal gieu.
- Suenter che Barnabas Varga ha scursanì per l’Ungaria suenter la pausa ha la Svizra ditg stuì temair per ils 3 puncts.
La finala èsi ina victoria meritada per ils Svizzers. Cunzunt en l’emprima mesadad ha l’equipa da Murat Yakin persvadì. Ils gols avant pausa han sajettà dus giugaders che paucs avant sin il radar. Cun nominar Kwadwo Duah e Michel Aebischer per Xherdan Shaqiri e Zeki Amdouni aveva Yakin procurà per ina surpraisa. Mo il trenader naziunal ha gì in bun nas. Sut la reschia dal capitani Granit Xhaka han ils Svizzers dictà il gieu avant pausa. Ils Ungarais n’èn strusch vegnì tar schanzas en l’emprima mesadad. Er betg pudì persvader ha il star da Liverpool en il cader da l’Ungaria, Dominik Szoboszlai.
Anc questa saira turna la naziunala Svizra cun tren enavos en ses camp a Stuttgart. La dumengia spetga sin ils giugaders in di da regeneraziun. A partir da glindesdi stat il gieu cunter la Scozia en il focus. Il gieu cunter ils «Bravehearts» è la mesemna saira a las 21:00 uras, danovamain a Cologna.
