Aifer be curt temp han ils organisaturs dal Maraton da skis engiadinais decidì, da betg laschar ir las passlunghistas ed ils passlunghists da la cursa da notg sur il Lai da Silvaplauna. La situaziun sin il lai è massa precara – massa blera aua smatga tras las sfessas si sin la surfatscha dal glatsch. Per part èn sa furmads lais sin la surfatscha. La decisiun ch'il maraton parta a Silvaplauna influenzescha uss era la cursa da notg, che parta quest onn a La Punt per Puntraschigna.
Preparar la nova partenza ed il traject
Per fortuna or da vista organisatorica na pretenda l’installaziun dad ina nova partenza sco quella per la cursa da notg betg uschè bler engaschi, sco per exempel l’installaziun dad ina nova arrivada. Là resta tut il medem. Suenter la partenza a La Punt maina la cursa da la val ensi, sur la plazza aviatica, lura da tschella vart da la via sur l’areal dal golf da Samedan en direcziun Punt Muragl, e da là davent vers Puntraschigna. Tuttina ha ils organisaturs stuì installar la nova partenza aifer da 12 uras. Vitiers vegn la preparaziun dal traject da la loipa da La Punt a Puntraschigna.
Nov record da participantas e participants
La sisavla ediziun da la cursa da notg, vegn a registrar in nov record da participantas e participants. Anc mai n'han passa 800 curriduras e curridurs fatg part a la cursa. La sisavla ediziun na vegn uschia betg mo ad ir en las annalas perquai ch’ella ha lieu per l’emprima giada sin il traject da La Punt a Puntraschigna, dentant era pervia dad in nov record. E la distanza vegn questa giada ad esser in zichel pli curta. Perquai che la loipa va levet amunt, datti mo ina cursa sur 16 kilometers.
