Passa 900 curriduras e curridurs han fatg part a la cursa da notg da Segl a Puntraschigna – in nov record. La cursa da notg è entant sa sviluppada ad ina vaira ivetta durant l’emna dal Maraton da skis engiadinais. Nagliur auter pon ins currer durant la notg cun ina glisch sin il frunt sin las loipas dal maraton. Era questa giada è la cursa stada insatge per las curriduras ed ils curridurs indigens. Tar ils umens han gist dus Engiadinais fatg ora la victoria in tranter l'auter.
A la fin è Noe Näff da Sent stà il pli spert. El ha gudagnà la cursa en il sprint avant Yannick Zellwerger da Fex. Tar las dunnas era Malia Elmer dad Elm la pli sperta.
Podest dals umens
- Näff Noe, Sent 37:37,6 min
- Zellweger Yannick, Fex, +0:00,2
- Milz Jakob, GER, +0:02,3
Podest da las dunnas
- Elmer Malia, Elm, 2002, 42:38,0 min
- Charrière Noémie, Charmey (FR), +1:42,5
- Happ Anna, GER, +1:45,7
Tut ils resultats dal Maraton da skis engiadinais
La cursa da notg en il rom dal Maraton da skis engiadinais è en il fratemp etablida. La cursa datti quest enviern gia per la setavla giada. La cursa da Segl a Puntraschigna maina sin in traject original dal Maraton da skis engiadinais, ed è senza dubi ina experientscha tut speziala.
Atmosfera tut speziala en il stgir – intginas impressiuns
Passa 900 curriduras e curridurs
Igl è segir insatge fitg spezial da currer cun ina glisch da frunt da l’Engiadin'Ota aval – sur ina distanza da 17 kilometers. Sin ils ultims meters fan alura fuschellas la glisch, fin tar l’arrivada al center da passlung a Puntraschigna. Passa 900 curriduras e curridurs èn questa giada stads da la partida. Quai è in nov record. Sco matadors locals èn per exempel Roman Alder ed Elia Beti da Puntraschigna stads a la partenza. Els avevan festivà ina victoria dubla indigena tar l’ediziun da l’onn passà.
Emprim test per loipa ed infrastructura
La cursa da notg dat als organisaturs dal Maraton da skis engiadinais era la pussaivladad da testar la loipa e l’infrastructura sut cundiziuns da cursa. La cursa da notg maina numnadamain sin in traject original dal Maraton – sur il Lai da Silvaplauna ed il Lai da Champfèr si vers la schanza a San Murezzan Bogn, e tras il God da Staz fin a Puntraschigna.
Qua tar la survista cumplessiva
che vegn actualisada cun mintga chaschun.
