Il Maraton da skis engiadinais (ESM), ina da las pli grondas occurrenzas da passlung en Svizra, stat davant porta. En gnanc mais duain ils passa 13’000 participants e participantas spetgadas, prender ils 42 kilometers sut ils skis.
Per la 55avla ediziun da la cursa da passlung, spetga Menduri Kasper, mainagestiun da l’ESM, che las cifras d’annunzias sa muventan sin il livel da l’onn passa. Fin uss èn annunziads bundant 11’500 persunas per la cursa.
Pli pacas sfidas e avunda naiv
Las loipas da Malögia fin S-chanf èn prontas, malgrà las temperaturas plitost chaudas. Era en la passascha legendara tras il guaud da Staz ha quai avunda naiv e la preparaziun da la loipa po vegnir fatga. Pli impurtant per Menduri Kasper è dentant che la part dal traject sur ils lais da l’Engiadin’Ota, u meglier ditg il glatsch da quels, portan quest onn las maschinas per far la loipa. Quai n'era betg il cas l’onn passa, e questas circumstanzas han lura sfurzà ils organisaturs da spustar la partenza da Malögia a Silvaplauna.
La speranza sin ina «normala» cursa
Quest onn guarda quai ora bain, uschia Menduri Kasper. Els sajan pronts da beneventar ils passlunghists e passlunghistas e metter a disposiziun il traject cumplet dal maraton da skis engiadinais da 42 kilometers.