Tge prestaziun da Therese Johaug. La passlunghista norvegiaisa ch’aveva terminà sia carriera suenter ils gieus olimpics da Beijing l’onn 2022 e turnada cun in segn d’exclamaziun en il circus da passlung. Cun in grond avantatg da passa trais minutas sin la concurrenza ha la passlunghista da 35 onns gudagnà per l’emprima giada la cursa da dunnas da Samedan a S-chanf. Segunda è vegnida Justyna Kowalczyk, er ella anteriura passlunghista da classa. Sin plazza trais curra la Grischuna Seraina Boner.
Tania Arquint e trais ulteriuras atletas èn vegnidas disqualifitgadas pervia da l'utilisaziun da tschaira fluor. Tania Arquint fiss vegnida terza, la Federaziun Internaziunala da skis FIS ha dentant controllà ils emprims sis e chattà tar ella la tschaira scumandada.
Saskia Barbüda – meglra engiadinaisa
Sper ils gronds nums da la scena da passlung internaziunala sa tschenta ina giuvna passlunghista indigena gest sper il podest sin plazza quatter. Saskia Barbüda dad Ardez gudogna la cursa en la categoria sut sedesch onns, e vegn quarta da la rangaziun cumplaina. Quai è in dals gronds success en la giuvna carriera da Saskia Barbüda e sa chapescha la meglra motivaziun per far part l’emna proxima al Maraton da skis engiadinais. Alura vul ella far il mez maraton. Ina buna prestaziun ha er mussà Selina Gasparin. L’anteriura biatleta ha terminà la cursa da las dunnas sin plazza set.
Passa milli dunnas a la partenza
Ils organisaturs da la cursa da dunnas tiran ina bilantscha positiva da la cursa da quest onn. Malgrà las grondas stentas en connex cun il Maraton da skis engiadinais, nua ch'ins ha decis da spustar la partenza da Malögia a Segl, ha la cursa da dunnas pudì vegnir manada atras senza incaps. Sin il traject da 17 kilometers tranter Samedan e S-chanf n'ha quai dà nagins gronds problems, tut ha funcziunà tenor giavisch. L’emprova generala e pia gartegiada. En vista a la cursa da la fin d’emna proxima resta anc bler da far. La cursa da dunnas è dentant stada ina buna emprova.
