Elena Sanna Stucki - Ses sigl direct en il cader B

Il siemi da far ina carriera da skis han blers. Ma propi viver quest siemi pon mo paucs. La via è lunga e dira ed i dovra ina nunditga disciplina. Sa chapescha era in pau talent. Elena Sanna Stucki da Flond ha il potenzial per ina carriera da skis. Quai han ses trenaders gia prognostitgà avant intgins onns. Uss stat la Sursilvana che fa il gimnasi da sport a Tavau, avant si'emprima stagiun en in cader da Swiss Ski.

Dal cader NLZ-Ost direct en il cader B

En sias disciplinas da parada, la cursas da speed, ha Elena Stucki gist en sia emprima stagiun en la Cuppa europeica fatg plirs resultats en ils puncts. E sin livel da cursas da la FIS ha la skiunza da 19 onns realisà pliras victorias e podests. En la cursa rapida ha ella fatg il sigl en il ravugl da las meglras 75 dal mund. En il Super-G è ella tranter las top 100.

Success, che han lura a la fin da la stagiun muntà la selecziun en ses emprim cader da Swiss Ski. Davent dal Center da prestaziun naziunal ost (NLZ-Ost) direct en il cader B.

Nausch siemi al final da la Cuppa europeica

Il plaschair è stà grond cura che Elena Stucki ha pudì ir si en la Scandinavia al final da la Cuppa europeica. Avant che insumma esser stada sin la pista a Kvitfjell schabegia il discletg. Betg sin ils skis, mabain cun ir a pè sa glischna ella tup. Diagnosa: ina fractura da l'oss dal ventrigl che ha duvrà in'operaziun. Quai n'è betg stada l'emprima blessura en ses giuvens onns, ma la pli greva. Ina fin disgraziada da la stagiun 2023/24. Ils buns resultats e la selecziun da Swiss Ski hajan laschà dumagnar in pau pli tgunsch ils mais da rehabilitaziun, gi Elena Stucki.

Nov team – novs privilegis – novas finamiras

Tras la blessura n'ha Elena Stucki betg pudì far sco giavischà tut las preparativas per la nova stagiun. I mancan surtut gis sin ils skis. Tge che na manca betg èn las finamiras ed ambiziuns. En il classament general da la Cuppa europeica vul ella esser la fin da la stagiun en las top 30, tant en la disciplina cursa rapida sco era en il super-G. E lu vul la skiunza ch'è creschida si sco pitschna da trais fargliuns al pe dal Piz Mundaun, sa qualifitgar per ses emprim campiunadi mundial. Ils mundials da las junioras, ch'èn il cumenzament da mars a Tarvisio. E gugent turnar cun ina medaglia da l'Italia. Elena Stucki sa legra sin sia emprima stagiun en il cader B, cun in nov team nua ch'ella è la giuvna e sto chattar ses plaz. Ma ella po uss, sco atleta en in cader da Swiss Ski, profitar d'avair tranter auter in um da service e sustegn fisioterapeutic. Ed er il burdi finanzial vegn grazia a dapli sponsurs in pau pli pitschen.