Per la pli flaivla equipa da la National League è la promoziun da liga il pli grond chasti. Il HC Ajoie ch'ha da far questa via po be perder. Percunter che la squadra ch’è vegnida campiun Svizer en la Swiss League, il EHC Visp, ha gia gudagnà bler e po uss be pli gudagnar anc dapli. Il sustegn ch'ins survegnia saja grond.
Sch'ins ha uschè in success, alura han ils fans grond gust e sustegnan l’equipa fermamain.
Dapi il 2019 gioga Fadri Riatsch, oriund da Sent en Engiadina, per ils Vallesans. Questa stagiun saja dentant speziala. Cun mintga victoria saja creschì il «sentiment da gudagnar», uschia il attatgader. Plinavant hajan ins in avantatg mental. Ajoie ha pers bleras partidas durant la stagiun ed er il playout final cunter Lugano. Il EHC Visp da chella vart ha gudagnà durant ils playoffs tut las serias e cumbatta cun bler dapli fiduzia per ina plazza en la National League.
Titel numer quatter en la Swiss League
L’istorgia dal EHC Visp è gloriusa. Il cumenzament dals onns 60 era l’equipa vallesana la meglra da l’entira Svizra. L’onn 1960 era il EHC Visp promovì en liga naziunala A. Visp è vegnì campiun svizzer il 1962 e vice-campiun ils onns 1961, 1963 e 1964. Il onn 1964 ha Visp gudagnà la Cuppa svizra da hockey. Dapi lura è passà bler temp ed il EHC Visp ha anc pudì festivar quatter titels da campiun en liga naziunala B, respectiv en la Swiss League.
Per l’emprima giada dapi passa diesch onns po la squadra uss dentant puspè cumbatter per la promoziun en la pli auta liga da hockey Svizra. Encunter il HC Ajoie as decida tgenina da las duos equipas che fa part al campiunadi la proxima stagiun en la National League.