Cursas da skis a San Murezzan - L'aura ha fatg in stritg tras il quint als organisaturs

Tge di da bellezza che quai è stà la sonda, durant l’emprima cursa da super-G a San Murezzan. Aura da bellezza ed in spectacul sin la muntogna cun Lara Gut-Behrami sin il podest, ed il grondius comeback da Lindsay Vonn. La dumengia è la cuntrada dentant sa preschentada tut auter. Avant che la gronda naiv vegnia, ha ina zona da favugn procurà per quitads. Il favugn ha purtà en Engiadin'Ota ferms vents e tschajera. E la finala ha la Federaziun internaziunala da skis FIS stuì stritgar il segund super-G da la fin d'emna a San Murezzan.

Situaziun la dumengia a San Murezzan

Dieschmilli fans sin la Corviglia

La plazza da podest da Lara Gut-Behrami ed il stupent comeback da la gronda Lindsay Vonn han procurà questa giada per las lingias grassas. Gest er il comeback da Lindsay Vonn ha attratg fitg bleras amias ed amis dal sport da skis. Quai è la paja per ils gronds sforzs dals organisaturs da las cursas a San Murezzan. Gugent avessan els beneventà er la dumengia ina gronda fulla glieud che vegn a persequitar las cursas da skis. L’aura ha dentant fatg ad els in stritg tras il quint. Uschia resta la bilantscha dad ina stupenta sonda, ed ina dumengia per emblidar.

Puspè diesch skiunzas svizras previsas

Sco gia tar l’emprim super-G da la sonda a San Murezzan, aveva il scheftrenader Beat Tschuor puspè gì nominà diesch skiunzas svizras. Leader da la squadra svizra fiss natiralmain stada Lara Gut-Behrami. Cun sia segunda plazza la sonda ha ella realisà sia novavla plazza da podest tar las cursas da la cuppa mundiala a San Murezzan. Dentant er la campiunessa olimpica da la cursa aval Corinne Suter vegn suenter sia greva ferida dal schanugl adina meglier en furma. La sonda è ella vegnida dieschavla. Insumma è San Murezzan in bun lieu per las skiunzas svizras. En Engiadin'Ota han ellas gia pudì festivar inqual grond success.