Mathias Flückiger vegn sco gia als gieus olimpics ed als campiunadis mundials segund, quella giada davos il Brasilian Enrique Avansini. Cumplettà il podest sco terz ha il Franzos Victor Koretzky. Il campiun mundial Nino Schurter è vegnì 5avel cun sis secundas retard.
Tar las dunnas è Jolanda Neff vegnida terza. Gudagnà ha la Svedaisa Jenny Rissved, avant la Evie Richards da la Gronda Bretagna. La campiunessa mundiala da short track, Sina Frei, è vegnida otgavla.
La cursa principala da cross country da la cuppa mundiala a Lai ha lieu la dumengia. La sonda stattan sin il program las cursas da downhill.
