Suenter ses defect tecnic è Nino Schurter anc vegnì da far bun tschintg plazzas. Per dapli n’hai betg tanschì. La finala ha el cuntanschì l’arrivada cun in retard da passa duas minutas sin il victur Mathias Flückiger. Il Lumnezian resta dentant il leader dal classament general da la cuppa mundiala.
Il venderdi era Nino Schurter anc vegnì segund en la cursa da short-track davos il Tudestg Luca Schwarzbauer ch’è vegnì 5avel en la cursa da cross-country.
Podest cross-country umens d’elita:
- Mathias Flückiger (SUI) 1:28:03 uras
- Thomas Griot (FRA) +23 secundas
- Thomas Pidcock (GBR) +44 secundas
Albin sut ils top 10
Ir in zic meglier che a Nino Schurter èsi a l’auter mountainbiker da Tersnaus. Vital Albin è vegnì 10avel ed ha uschia realisà ses meglier resultat da la stagiun. Vital Albin veva gia persvadì avant in onn a questa cursa sin 2000 msm ad Andorra sco 6avel. Sin ses collega d’equipa Mathias Flückiger ha Vital Albin pers 2:11 minutas.
Flückiger ina classa per sa sez
Gudagnà la cursa ha a moda suverana Mathias Flückiger. Il Bernais ha dictà il tempo davent da l’entschatta e gia baud pudì sa distanziar da l’entira concurrenza. Cunquai ha Flückiger er pudì far revantscha per la terrada als campiunadis mundials a Glasgow nua ch’el era vegnì be 12avel. Per l’actual campiun svizzer è quai la 6avla victoria en ina cursa da cross-country da la cuppa mundiala, l'emprima dapi passa in onn.
La finala ha Mathias Flückiger triumfà avant il Franzos Thomas Griot ed il Brit e campiun mundial da Glasgow, Thomas Pidcock. Cun Lars Forster sco 6avel (+1:23 min.), Thomas Litscher sco 8avel (+1:50 min.) e Marcel Guerrini sco 13avel (+2:33 min.) han anc trais ulteriurs svizzers persvadì a Vallnord. Plinavant è il Tessinais Filippo Colombo vegnì 26avel (+5:33 min) en sia emprima cursa da la cuppa mundiala suenter sia blessura.
Keller danovamain sin il podest
Suenter sia victoria en la cursa da short-track ha Alessandra Keller er cuntanschì in plaz da podest en la cursa roiala da cross-country. Keller è vegnida segunda ed uschia cuntanschì sia quarta plazza da podest da la carriera en questa disciplina. La mountainbikera dal chantun Sutsilvania ha pers 34 secundas sin la victura austriaca Mona Mitterwallner ch’ha cun ses 21 onns festivà sia emprima victoria en la cuppa mundiala. Cumplettà il podest sco terza cun in retard da gia 1:34 minutas ha la campiunessa mundiala, la Franzosa Pauline Ferrand-Prévot. Cun Jolanda Neff sco 13avla e Nicole Koller sco 14avla èn anc duas ulteriuras svizras classadas sut las top 15.
La proxima cursa da la cuppa mundiala spetga lura mez settember a Les Gets en Frantscha. La fin da settember e l’entschatta d’october stattan lura sil program las davosas duas cursas da la stagiun a Snowshoe en ils Stadis Unids ed a Mont-Sainte-Anne en il Canada.