Finalmain - Marco Odermatt gudogna sia emprima cursa rapida da la cuppa mundiala. Fin oz er'el stà 11 giadas sin il podest, 8 giadas segund. Savens avevan be paucs tschientavels mancà per ina victoria.
Questa giada hai però tanschì. Odermatt ha mussà ina cursa perfetga. El ha ristgà tut, principalmain en la passascha-clav, il Kernen-S, nua ch'el ha er fatg la gronda differenza. La finala ha el laschà davos ils dus actual gronds rivals en questa disciplina, il Franzos Cyprien Sarrazin che veva anc battì dacurt piz a cup Marco Odermatt a Bormio ed il Norvegiais Aleksander Aamodt Kilde ch'ha gudagnà ils davos dus onns la cursa rapida dal Lauberhorn.
Il podest:
- Marco Odermatt (SUI) 1:43,32
- Cyprien Sarrazin (FRA) +0,58 sec.
- Aleksander Aamodt Kilde (NOR) +0,81 sec.
Sco quart e tschintgavel èn classads ils dus Talians Florian Schieder e Dominik Paris, 6avel è vegnì l'American Ryan Cochran-Siegle.
Mussà ina buna prestaziun a Wengen ha er il quartet svizzer cun Justin Murisier, Niels Hintermann, Alexis Monney e Franjo von Allmen ch'èn tuts classads sut ils top 15. Betg ì sco giavischà èsi perencunter la Grischun Stefan Rogentin. En ha pers passa duas secundas sin Marco Odermatt e stuì sa cuntentar cun il 22avel plaz. Il skiunz da Lai ha dà oda maun in top resultat en il Kernen-S.
Marco Kohler, il giuven svizzer che veva persvadì il december cun dus plazs da top 10 a las cursas rapidas da Val Gardena e Bormio, è cuppitgà ed ha stuì vegnir transportà davent cun helicopter. Emprimas examinaziuns en l'ospital han mussà che Kohler ha stgarpà il liom cruschà ed il meniscus e stratg in liom intern dal schanugl dretg. Gia il 2020 era Kohler sa blessà grevamain vid in schanugl al Lauberhorn. Questa giada èsi l'auter schanugl.
Il venderdi spetga a Wengen il super-g. En questa cursa era Stefan Rogentin vegnì avant in onn segund ed uschia procurà per il meglier resultat da la carriera. La sonda stat lura sin il program la cursa rapida dal Lauberhorn sin la pista originala e la dumengia van las cursas da Wengen a fin cun il slalom.
Ulteriurs Svizzers:
- 10. Justin Murisier +1,44 sec.
- 11. Niels Hintermann +1,52 sec.
- 12. Alexis Monney +1,58 sec.
- 14. Franjo von Allmen +1,63 sec.
- 22. Stefan Rogentin +2,18 sec.