Selina Egloff da Scuol ha 23 onns e valeva ina giada sco grond talent da skis. Gia cun 18 onns ha ella festivà sia premiera en la cuppa mundiala da skis. Quai era il 2019 tar il slalom da Levi. Ed il medem onn ha ella era pudì festivar sia emprima plazza da podest en la cuppa d’Europa. Suenter ils emprims buns resultats en la cuppa d’Europa e tar ils campiunadis svizzers da junioras è quai dentant vegnì quiet enturn la skiunza da Scuol. Uschè quiet ch’ella ha prendì il 2022 in onn pausa per puspè survegnir plaschair vi dal sport da skis.
In onn pausa ed alura il comeback
Suenter ina pausa dad in onn è Selina Egloff puspè turnada sin ils skis da cursa e sin las pistas – uss dentant cun ina passiun dapli en la buscha. Durant ses temp senza sport da skis ha ella decidì da far la scolaziun da magistra. Uschia ha ella cumenzà cun la scolaziun a la Scola auta pedagogia PHGR a Cuira. Ils mais da primavaira e durant la stad s’occupa Selina Egloff pli intensiv da la scolaziun. Ils mais d’enviern è ella en viadi cun ils skis, surtut en la cuppa d’Europa.
A scola n’ha jau tut in auter ambient nua ch'i na va betg per resultats e rangs.
Finamira è da far il proxim pass
La preparaziun sin la nova stagiun da skis n'era betg uschè ideala per la skiunza da Scuol. Ella ha stratg ils bindels dad ina chomma, ed uschia ha ella stuì far ina pausa da trenament e suenter be pass per pass puspè pudì cumenzar cun il trenament. Uschia che la skiunza dovra anc in zichel temp da preparaziun. Quel ha ella segir era. E sch'ella è puspè unfisa dal sport da skis, po ella investir dapli temp e peda en la scolaziun sco magistra. Per Selina Egloff è l'essenzial dad avair anc insatge tut auter che il sport da skis che satisfa ella.
