Club da hockey da Tavau - Il HCD è pront per la nova stagiun

El gioghia simplamain enorm gugent hockey – finì. Quai è la simpla clav da success d'Andres Ambühl. Cun passa 40 onns è el anc adina in leader sin e sper il glatsch dal Club da hockey da Tavau. Cler, Andres Ambühl è era benedì cun ina fitg buna sanadad. Durant tut ils onns ch'el dat ussa gia hockey sin il pli aut nivel è el stà preservà da grondas blessuras. Ensemen cun ses congiugaders dal HCD emprova el da gudagnar in ulteriur titel. Per che quai daventia realitad ha dentant bler da constar tar il Club da hockey da Tavau. L’equipa ha d'esser productiva e sto pia far gols. Il medem mument ha ella d'agir or d'ina buna e solida defaisa. Per finir dovri sa chapescha era blera fortuna e l’equipa sto restar sauna.

Reuniun da Barandun e Gross tar il HCD

En lur giuvens onns han ils defensurs engiadinais Davyd Barandun da Madulain e Nico Gross da Puntraschigna giugà ensemen tar ils juniors da l'EHC San Murezzan. Pli tard ha Davyd Barandun fatg il pass tar il Club da hockey da Tavau. Nico Gross è ì sia atgna via tar l'EV Zug e da là en l'OHL (Ontario Hockey League) tar l’equipa Oshawa Generals. El è alura turnà en il hockey da maiorens tar l'EV Zug. Quatter stagiuns ha il defensur engiadinais giugà en il dress da l'EVZ. Durant quest temp ha el gudagnà dus titels da campiun svizzer – ed uss ha el midà tar il HCD. Per Nico Gross e quai l’equipa da ses cor, da quella ch’el era gia da mattet in grond fan. Tar il HCD vul Nico Gross surpigliar ina rolla anc pli impurtanta en la defaisa. Davyd Barandun vul simplamain far il proxim pass e vegnir anc meglier. Per el cumenza gia l'otgavla stagiun en il dress dal Club da hockey da Tavau.

Il HCD è pront per la nova stagiun