Igl è sa midà ina pluna, betg sulet las colurs dal club. Er privat hai dà novas midadas. Tut quai dat però er blera motivaziun.
Suenter la stagiun passada n’ha il Club da hockey da Tavau dentant betg pli prolungà il contract cun il defensur engiadinais. Il HCD ha gì auters plans, in’autra filosofia, uschia ch’il hockeyan da 29 onns è stà sfurzar da chattar ina nova via. Quella ha manà Paschoud en la Bassa, en la chapitala svizra tar il SC Berna.
Jau n’hai betg stuì ponderar ditg tge far. Il SCB è il pli grond club da hockey da la Svizra è per me uss cun 29 onns ina gronda challenge.
Tar il SCB ha Claude-Curdin Paschoud ina giada survegnì in contract fin la fin da la stagiun 2023/2024. El prendia stagiun per stagiun, era suenter sia greva blessura vi dal chau. La fin dal 2018 ha el survegnì in puck en in’ureglia e silsuenter patì sur onns vid ina scurlada dal tscharvè. Pir a partir dal 2022 po l’Engiadinais puspè dar regularmain hockey sin il pli aut livel. Quai vul el uss er far a Berna tar in dals pli gronds clubs da hockey en Svizra.
Plan da gieu dal SC Berna – stagiun 2023/24
Claude-Curdin Paschoud duai er gidar ils Bernais da returnar sin la via da success. Dapi il davos titel il 2019 n’ha il SCB mai pli cuntanschì dapli ch’il quartfinal. Cun il nov trenader finlandais Jussi Tapola, gist tschintg novs giugaders esters ed er cun l’Engiadinais Claude-Curdin Paschoud duai quai sa midar.
Jau hai gì in bellezza temp a Tavau e sun uschè cuntent dad esser stà ina part da questa istorgia dal HCD.
L’emprima giada enavos a Tavau turna Claude-Curdin Paschoud ils 3 d’october. Quest mardi saira vegni tar l’emprim duel en la nova stagiun tranter il HCD ed il SCB, in vair classicher da hockey en Svizra. El sa legria sin quest gieu a Tavau, er da puspè vesair ses anteriurs collegas d’equipa, sia famiglia e ses amis, mo la finamira saja da puspè turnar a Berna cun trais puncts, uschia il nov defensur bernais cun il numer 71, quest numer ch'el ha er purtà a Tavau.