Per atletas ed atlets svizzers èn quai campiunadis mundials tut spezials. La motivaziun è gronda d’astgar cumbatter per il tricot d’artg en l’agen pajais ed uschia avant ils fans da chasa. Per la terza giada ad in campiunadi mundial è er Elena Hartmann, la suletta rumantscha a la partenza. La ciclista oriunda da Domat che lavura dasperas anc sco policista parta tant en la cursa cunter l’ura, sia disciplina da parada, sco er en la cursa cunter l'ura da team e la cursa da via sur passa 150 kilometers. Sia premiera a campiunadis mundials aveva Hartmann, ch’è pir dapi bun dus onns ciclista professiunala, dà il 2022 en l’Australia. Avant in onn è la ciclista da 33 onns er stada a la partenza en Scozia e quest onn ha ella er gì a Paris sia premiera olimpica.
Quasi tut ils stars a la partenza
Il campiunadi mundial a Turitg empermetta in spitachel. Annunziads per quest ulteriur punct culminant da l’onn è quasi l’entira elita internaziunala. Ils gronds stars èn cunzunt Tadej Pogacar, il Sloven ch’ha dominà quest onn tant il Giro d’Italia sco er il Tour de France, lura il campiun mundial ollandais Mathieu van der Poel sco er Remco Evenepoel, il ciclist da la Belgia ch’ha gudagnà a Paris aur olimpic en la cursa da via sco er en la cursa cunter l’ura.
Er a la partenza è il Talian Filippo Ganna, il campiun mundial dal 2020 e 2021 en la cursa cunter l'ura, il Sloven Primoz Roglic ch’ha gudagnà dacurt per la quarta giada la Vuelta u il brit Joshua Tarling, il giuven talent da 20 onns.
Dals gronds nums manca sulet Vout van Aert ch’è cupitgà e sa blessà durant la Vuelta. Er betg a la partenza a Turitg va Jonas Vingegaard. Il dubel victur dal Tour de France dal Danemarc na vess però er betg udì tar ils favurits a Turitg.
Svizzers cun ambiziuns da medaglias
Cun Marc Hirschi en la cursa da via d’elita, Stefan Küng e Stefan Bissegger en la cursa cunter l’ura, Jan Christen, in candidat per aur en la cursa dals umens U23 ed in team da para ambiziunà na vul la Svizra betg sulet sa cuntentar cun la rolla d’ospitant da quels campiunadis mundials, mabain er cumbatter per las medaglias avant il publicum da chasa. Betg tranter las favuritas auda Elena Hartmann. Dar il meglier pussibel e simplamain giudair questas cursas a Turitg, quai la devisa da la ciclista grischuna che viva dentant a Baar en il chantun Zug.
Er tar las dunnas èn las top trais dal mund a la partenza. Quai èn Lotte Kopecky da la Belgia, l’Ollandaisa Demi Vollering e la Polaca Katarzyna Niewiadoma. Desister da quest punct culminant sto cunzunt la Svizra Marlen Reusser che patescha dal sindrom post-covid. Reusser veva gia stuì dar forfait per ils gieus olimpics a Paris.
La nominaziun svizra per il campiunadi mundial da ciclissem a Turitg
- Umens elita (7): Stefan Küng, Stefan Bissegger, Silvan Dillier, Marc Hirschi, Johan Jacobs, Mauro Schmid, Yannis Voisard
- Dunnas elita (4): Elena Hartmann, Caroline Baur, Elise Chabbey, Noemi Rüegg
- Umens U23 (3): Jan Christen, Fabian Weiss, Fabio Christen
- Dunnas U23 (2): Jasmin Liechti, Linda Zanetti
- Umens U19 (6): Nicolas Ginter, Nicolas Halter, Nicola Zumsteg, Nicolas Bialon, dus plazs vegnan surdads a curta vista
- Dunnas U19 (4): Muriel Furrer, Lara Liehner, Chiara Mettier, Sirin Städler
- Para-Cycling umens (10): Fabio Bernasconi, Roger Bolliger, Timothy Zemp, Benjamin Früh, Fabian Kieliger, Tobias Lötscher, Fabian Recher, Yves Schmied, Alain Tuor, Micha Wäfler
- Para-Cycling dunnas (4): Franziska Matile-Dörig, Flurina RIgling, Celine van Till, Sandra Stöckli
