Sco quai che l'Uniun da ciclissem internaziunala communitgescha, aveva l'accident chaschunà in trauma da la chavazza e dal tscharvè. Las raschuns per l'accident na sajan betg anc enconuschentas, las autoritads responsablas investigheschian anc vinavant. L'Uniun internaziunala da ciclissem, Swiss Cycling ed il comité d'organisaziun expriman lur cordoli en in communitgà communabel.
Muriel Furrer valeva sco talent vegnent en il ciclissem svizzer. Il zercladur passà era ella daventada segunda en la cursa cunter l'ura als campiunadis svizzers dals juniors. Però era en il mountainbike ed en il ciclissem champester eri da quintar cun Furrer.
Las cursas dals campiunadis mundias vegnan a cuntinuar ils proxims dis, dentant vegnan stritgadas occurrenzas al ur dals campiunadis. Ins resguardia uschia il giavisch da la famiglia da Furrer, hai num da la vart dals organisaturs.