Schah – il sport nua ch'i dovra pazienza, strategia e tactica
Dar schah na tutga sin il palpiri na betg dispit suenter in sport da spectachel. Ma dar schah è in art, in gieu fitg tactic che dovra pazienza. Ed i è er in gieu nua che in ruaus absolut vala. Betg in mucs è dad udir quest'emna al campiunadi svizzer da schah durant ils gieus che cuzzan fin tschintg uras. Gia per la quarta giada, suenter il 2012, 2016 e 2021 vegn il campiunadi svizzer manà atras en la Waldhaus Arena a Flem. Radund 250 giugadras e giugaders èn da la partida. E gist per vegnir tar il pregiudizi: Na, i n'è insumma betg il cas che mo vegls dattan schah.
Al campiunadi a Flem èn giugaders da tuttas vegliadetgnas da la partida. Da scolars primars fin tar persunas pensiunadas. E dal reminent fa er Christian Levrat, l'anteriur president da la partida socialdemocratica svizra part al campiunadi.
Mintga partida è unica e quai cumbat da patratgs è simplamain fascinant.
Highline – il sport ch'è er in zic in lifestyle
Mo paucs kilometers davent sa duelleschan atletas ed atlets en tut in auter sport durant quests dis. A Laax sin il Crap Sogn Gion ha lieu il campiunadi mundial da Highline. In sport nua ch'i vegn ballantschà lunsch sur tiara sin ina tschinta lada.
Da l'entir mund èn atletas ed atlets vegnì a Laax per sa duellar en duas differentas disciplinas, numnadamain en la disciplina da spertadad ed en il freestyle. En tut passa 40 atletas ed atlets èn da la partida al campiunadi mundial sin il Crap Sogn Gion.
I n'è betg mo in sport, quai è in'entira filosofia davostiers.
Avant var 2 onns è l'associaziun «Swiss Slackline» uffizialmain daventada commembra da «Swiss Olympic». La Svizra è cunquai l'emprim pajais che renconuscha slackline sco sport. E cunquai vegnia il sport era recipì tut auter ch'enfin qua, di il president da l'associaziun Thomas Buckingham. El è persvadì ch'il sport saja cunquai sin via da daventar in di in sport olimpic. Il matador local – il Lumnezian Ramun Tomaschett – è actualmain anc plitost sceptic, sche slackliners vegnian in di a cumbatter per medaglias olimpicas. Plaschair avess el dentant en mintga cas.
Dal reminent - RTR ha purtretà dacurt l'atlet da 26 onns. Cumenzà cun quest sport extrem ha Ramun Tomaschett avant radund 7 onns.
