Per l'emprima giada ha gì lieu quest onn in campiunadi mundial da «Highline» ina sparta dal sport da «Slackline». A Laax sin il Crap Sogn Gion èn sa mesirads 24 atlets e 7 atletas en las disciplinas «Freestyle», separà – umens e dunnas – e «Speed» – communablamain.
Tranter ils sis Svizzers e Svizras ch'èn sa participads, è era in Grischun, Ramun Tomaschett da Cumbel.
Da vegnir ensemen per l’emprim campiunadi mundial – saja insatge dal tuttafatg spezial per las atletas ed ils atlets da tut il mund, di il matador local. Uschia possian ins emprender ina massa in da l’auter – e surtut era passentar temp ensemen. Il sentiment da concurrenza n’existia insumma betg – ils atlets e las atletas sajan plitost ina gronda famiglia che vul gidar in a l’auter.
Ramun Tomaschett ha cumenzà cun slackline avant quatter onns. Per el saja quai – sper ses mastergn sco lainari – il cuntrast perfetg. Il sentiment da libertad en talas autezzas – quai giaja mo cun highline – e perquai saja quai ina tala passiun per il Lumnezian da 24 onns.
Ils ulteriurs Svizzers:
- Samuel Volery, ZH
- Richard Schupisser, ZH
- Raphael Bacot, VD
- Kasia Tschopp, BE
- Arne Lauwers, NW
Il campiunadi ha cuzzà dals 15 fin als 17 da fanadur. Il program ha vis ora suandantamain:
- Venderdi: qualificaziun
- Sonda: Finale «Speed» e quartfinal «Freestyle» dals umens
- Dumengia: Mezfinal e final da «Freestyle» da tuts
