Las Svizras han dentant tremblà enfin la fin da la partida – ina partida che ha duvrà pazienzia e gnarva. Pir en la 121avla minuta ha Fabienne Humm sajettà il gol decisiv.
L'equipa dal Wales è numnadamain ida en avantatg gia en la 19avla minuta. Curt avant pausa èsi reussì a Ramona Bachmann d'egualisar la partida. En la segunda mesadad èn dus gols da la Svizra vegnids annulads: In penalti che Ana-Maria Crnogorcevic ha tutgà pir cun sajettar suenter ed in gol da Ramona Bachmann pervi d'in offside. Perquai èsi vegnì ad ina prolungaziun ed il gol da la victoria ha Fabienne Humm sajettà pir en la 121avla minuta.
Il campiunadi mundial da ballape ha lieu la stad 2023 en l'Australia e la Nova Zelanda. Igl è la segunda giada che l'equipa da las dunnas sa qualifitgescha per ina runda finala. L'onn 2015 eran las Svizras crudadas ora en l'otgavelfinal cunter il Canada.