Il campiunadi europeic da dunnas vala sco pli gronda occurenza da sport da dunnas en l'Europa. En Svizra avess il turnier lieu en nov differentas citads cun Basilea sco lieu principal. Dentant be mo cun ina buna campagna d'infurmaziun vegnia ins, tenor la Federaziun svizra da ballape, a far pli popular il ballape da dunnas en Svizra.
Auters pajais er pronts per candidar
Il dossier final per la candidatura vegn surdà l'atun a l'UEFA. La quala decida ils 25 da schaner 2023 en tge pajais ch'il campiunadi europeic ha lieu. Sper la Svizra vulan er la Frantscha, la Pologna, l'Ucraina ed in'allianza dals pajais scandinavs manar atras l'euro da dunnas 2025. I fiss il segund campiunadi europeic da ballape en Svizra suenter l'euro dals umens il 2008.