Al mattadur local Laurin Fravi n’èsi er betg ì sco giavischà en la cursa da sprint dal campiunadi europeic da biatlon a Lai. Il biatlet ch’ha festivà il di avant il 24avel anniversari ha, malgrà be dus sbagls da sajettar, stuì sa cuntentar cun il 87avel plaz. El manchenta cleramain in plaz sut ils top 60 per uschia astgar parter la sonda a la cursa da persecuziun.
Sa qualifitgads per la cursa da persecuziun èn perencunter ils ulteriurs trais svizzers, er sche la cursa da sprint n’è er betg gartegiada sco giavischà ad els. Dajan Danuser è stà cun trais sbagls da sajettar il meglier svizzer sin plaz 47. Sandro Bovisi è vegnì 50avel e Joscha Burkhalter ha stuì sa cuntentar cun il 54avel plaz. Tuts trais han pers bun duas minutas e mesa sin ils pli sperts.
Festa norvegiaisa en il sprint dals umens
Betg stads da franar en questa cursa da sprint èn ils Norvegiais. Erlend Bjoentegaard ha gudagnà 11,5 secundas avant ses cumpatriot Vebjoern Soerum. Cumplettà il podest sco terz ha Tudestg Philipp Nawrath ch’ha gudagnà bronz per be ina secunda.
Nagin exploit da las Svizras
Er en la segunda cursa al campiunadi d’Europa da biatlon a Lai, ina cursa da sprint sur 7,5 kilometers, n’han las Svizras betg pudì persvader. La meglra dal quartet svizzer è stada Susanna Meinen. La biatleta da 30 onns dal chantun Berna è vegnida 27avla. Ella ha fatg in sbagl da sajettar e la finala pers ina minuta e mesa sin las pli spertas.
Manchentà be per pauc in plaz sut las top 30 ha Lea Meier. La suletta grischuna è vegnida 32avla cun dus sbagls da sajettar. Lydia Hiernickel ha fatg quatter sbagls da sajettar ed è vegnida be 53avla e Flurina Volken ha cun trais sbagls da sajettar stuì sa cuntentar cun il 59avel plaz. Uschia èn almain tuttas quatter biatletas sa qualifitgadas per la cursa da persecuziun la sonda. En questa cursa partan las meglras 60 dal sprint.
Stretg cumbat per las medaglias
Nova campiunessa d’Europa ed uschia gudagnà aur en la cursa da sprint ha Anastasiya Merkushyna. L’Ucranaisa ha battì per ina mesa secunda la Svedaisa Tilda Johansson. Cumplettà il podest sco terza, quai cun in retard da be 1,8 secundas, ha la Tudestga Vanessa Hinz.
La sonda stattan sin il program las cursas da persecuziun cun mintgamai ils megliers 60 dal sprint e la dumengia va il campiunadi d'Europa a Lai a fin cun las cursas da staffetta.
