La stad passada è Annina Tomaschett stada l'emprima tiradura sursilvana ad ina concurrenza da la cuppa mundiala. Uss è ella l'emprima juniora grischuna che po ir ad in campiunadi europeic.
Siemià hai adina - realisà però pir, cura che hai legì nair sin alv.
Sajettar cun la buis d'aria e cun il caliber pitschen è sia passiun. Annina Tomaschett che cumplenescha quest onn ses 20avel anniversari sajetta dapi ch'ella è ina mattetta – infizada da ses bab, ses augs e ses fragliuns. Il pli gugent sajetta ella cun sia buis d'aria sin la distanza da 10 meters. E sin quella distanza sa mesira la giuvna talentada da Trun ils 25 da favrer cun 60 concurrentas da l'entira Europa. Ella è ina da 14 tiradurAs che represchenta la Svizra al campiunadi europeic en Pologna.
Sch'jau vegn da clamar giu mes maximum pussaivel a l'EM, lura sun cuntenta.
Per ses grond siemi desista Annina Tomaschett sin bler. Ella sa che da nagut vegn nagut. En vista a l'EM va ella mintga fin d'emna a Magglingen a trenar. Plinavant fa ella ina giada l'emna viadi en Glaruna, en in dals centers regiunals per talents giuvens. E bler trenescha ella a chasa, en il stan da tir a Trun.
Il campiunadi europeic da sajettar cun buis d'aria e cun pistola cumenza glindesdi, ils 24-2 e cuzza fin l'emprim da mars. Il grond di d'Annina Tomaschett en Pologna è mardi ils 25-2. Sustegn giu da la tribuna d'aspectaturAs survegn ella da ses geniturs e ses fragliuns.
RTR sportissimo 17:00