Suenter ina pausa da diesch onns èn ils campiunadis mundials da bob e da skeleton puspè ina giada sin la bobera da San Murezzan a Schlarigna. La pli gronda sculptura da glatsch dal mund è il medem mument er la pli veglia bobera dal mund. L’elita dal sport da bob e da skeleton s’entaupa durant ils proxims dis en la tgina dal sport da bob e da skeleton. A San Murezzan è vegnì fundà l’onn 1897 l’emprim club da bob e davent da lura datti cursas en la bobera da San Murezzan a Schlarigna.
Sara Schmied è l’unica Svizra che parta a las cursas da skeleton
Cun mo 17 onns è Sara Schmied da Schlarigna la pli giuvna participanta a las cursas da skeleton da las dunnas. Il medem mument è Sara Schmied er l’unica Svizra a la partenza. Quests campiunadis mundials èn unics per l'atleta giuvna ch'è creschida si ed abitescha a Schlarigna. Cursas da l’elita mundiala gist avant porta chasa na datti betg uschè savens. Er sche Sara Schmied era gia da la partida avant dus onns, lura cura che la bobera a San Murezzan era il chanal da glatsch dals campiunadis mundials da juniors.
Davent da chasa cun la schlitta tar la bobera e puspè a chasa
Las cursas dals campiunadis mundials da skeleton van dus dis. Sin las meglras dunnas spetgan quatter percurs. Dentant èn mo las 20 pli spertas curriduras da la partida tar tut las quatter cursas. Sara Schmied di che quai vegn a vegnir grev. Dentant ina plazza en las top 25 è la finamira. Che Sara Schmied ha la classa per esser uschè sperta ha ella mussà dacurt a Winterberg. Tar il campiunadi mundial da junioras è ella vegnida settavla, ed en la categoria sut 20 onns perfin vicecampiunessa mundiala.
