Ils campiunadis mundials da bob e skeleton a San Murezzan èn per il pilot indigen Céderic Follador ils campiunadis mundials da chasa. Nagliur auter è quai per il pilot da Bever uschè simpel da vegnir a la bobera. E nagliur auter èsi uschè simpel da vegnir a guardar las cursas per sia famiglia e per quels che sustegnan el. En la tgina dal sport da bob e da skeleton han gia lieu per la 21avla giada campiunadis mundials. Per Cédric Follador è quai ina premiera a San Murezzan.
Pli ferm en il bob a quatter
Pervia dals campiunadis mundials a San Murezzan ha Cédric Follador reducì ses pensum da lavur, ed intensivà il trenament. Quai ha purtà fritgs. Durant questa stagiun ha il pilot engiadinais cuntanschia tschintg resultats da top ten. Tuts cun la schlitta gronda, cun il bob a quatter. E perquai è il pilot da Bever er vegnì nominà sco terz pilot svizzer che sa far part als campiunadis mundials. Ensemen cun sia squadra funcziunescha quai actualmain en il bob a quatter. Cler che Cédric Follador vul mussar sia fermezza er sin la bobera da chasa. Er sch'ins na po betg dir ch’el profitescha dad in avantatg da chasa. La bobera da San Murezzan a Schlarigna è natirala, ed uschia ha ella mintga stagiun in zichel in'autra lingia.
Finamira plazza tranter ils megliers otg
Per eruir il campiun mundial fan las schlittas quatter cursas. Adina duas per di, la sonda e la dumengia. Pervia da la concurrenza fitg ferma sto ins esser pronts davent da l’entschatta. Ils tschientavels ch'ins perda percunter la concurrenza en il chanal da glatsch da San Murezzan èn fitg grev da prender suenter. En il trenament ha Cédric Follador gia ina giada mussà ch'el ha enta pugn la bobera. Tar l’emprim trenament en il chanal da glatsch da l’Engiadina Auta è el vegnì terz. Uss sto Follador be pli mussar ina sumeglianta prestaziun durant la cursa.
