En sia biografia lascha Arno Del Curto passar sia vita. Spert daventa cler che quella è stada sumeglianta sco quai ch'el ha adina propagà il dar hockey: svelt, dinamic, dramatic, adina pront per risico. L'Engiadinais da 65 onns sa regorda da las victorias e terradas las pli spectacularas dal HC Tavau, recapitulescha las impurtantas midadas ed il svilup dal hockey sin glatsch. Declera sia rolla sco motivatur e leader entaifer l'equipa. Sper il hockey dat el era invista profunda da sia vita privata, famiglia, uffanza, crisas e destins.
La fin al cumenzament
Gist al cumenzament da ses cudesch «Mit Köpfchen durch die Wand» declera Arno Del Curto daco ch'el ha avant trais onns, entamez la stagiun, bandunà il HC Tavau. Ed era davart ses curt intermezzo il 2019 tar ils ZSC Lions. Ses 22 onns tar il HCD sajan stads «obergail». Sulet ses ultim onn a la banda, in magari nair. Intern era Arno Del Curto vit, senza energia. Insatgè cumplet nov per quel ch'ha si'entira vita dà gas. El conceda d'avair manchentà il dretg mument da chalar. Pers il sentiment per las atgnas limitas.
Rebel – hippi – rockstar
Il trenader svizzer cun il pli grond success raquinta da si'uffanza en relaziuns mudestas. Da ses temp da giuventetgna selvadi. Avant che Arno Del Curto ha vulì daventar profi da hockey semiava el d'esser in bel di in rockstar. El carezava musica dira da Black Sabbath e Led Zeppelin. La ghitarra electrica sunavia el detg passabel, manegia Del Curto guardand enavos, ed el avevia era la frisura d'in rockstar, ina chavalera lunga. A Turitg en il Kreis 4 festivà partys selvadias. Era pli tard saja el stà in rebel.
Mai pli trenader
Sper sia biografia ch'el vul il proxim temp propagar ha Arno Del Curto anc inqual project ch'el sa deditgescha. Ensemen cun l'anteriur hockeyan Marcel Niederer ch'è oz um da fatschenta, bajegia el ad Arosa in hotel cun in cumplex da suitas, in spa ed ina ustaria. Lascha renascher il «Posthotel» che ha brischà avant quatter onns. Plinavant ha el fundà cun in inschigner in startup che producescha betun ch'è neutral areguard il CO2.
Ussa vesan ins mai sco quel che jau sun: In tip normal.
Arno Del Curto – Mit Köpfchen durch die Wand. Biografie eines Machers.