La Punt en l’Engiadina e Tavau èn quest onn ils dus lieus principals dal Swiss Epic, il frar pitschen dal Cape Epic en l’Africa dal Sid. Durant 5 dis vegnan conquistads ils pli bels trutgs e trails en questa regiun che vala sco paradis da bike. A la partenza, quai en teams da dus, van profis so era amaturs passiunads.
I spetga la 11avla ediziun dal Swiss Epic ch'aveva gì sia premiera il 2014 en il Vallais. Dapi il 2019 vegn questa cursa pretensiusa manada atras en il Grischun, quest onn dals 20-24 d’avust. Er a la partenza il 2024 è il «Team RTR» cun Andreas Wieland (redactur da sport) e Cornelia Schwarzentruber.
Infurmaziuns Swiss Epic 2024
5 dis – 341 kilometers – 11'400 meters d’autezza
Durant 5 etappas han participantas e participants d’absolver passa 340 kilometers cun radund 11’400 meters d’autezza. L’etappa roiala spetga il segund di. Lura vegn bandunà l’Engiadina direcziun Tavau, in’etappa sur 81 kilometers cun 2'550 meters d’autezza. Questa etappa maina tranter auter sur il Pass dal Scaletta, cun 2'606 meters sur mal il pli aut punct dal Swiss Epic 2024. La quarta etappa maina quest onn da Tavau a en la chapitala grischuna a Cuira, in’etappa cun 3'350 meters descensiun. A fin va il Swiss Epic sco ils davos onns a Tavau.
Data | Etappa | Profil |
20-08-2024 | La Punt – La Punt | 76 km / 2'150 m d'autezza |
21-08-2024 | La Punt – Tavau | 81 km / 2'550 m d'autezza |
22-08-2024 | Tavau – Tavau | 64 km / 1'950 m d'autezza |
23-08-2024 | Tavau – Cuira | 62 km / 2'400 m d'autezza |
24-08-2024 | Tavau – Tavau | 61 km / 2'350 m d'autezza |
Victurs dal Swiss Epic 2014-2023
Umens:
- 2023 – Martin Stosek (Tschechia) / Marc Stutzmann (Svizra)
- 2022 – Fabian Rabensteiner (Italia) / Daniel Geismayr (Austria)
- 2021 – Nicola Rohrbach (Svizra) / Lukas Flückiger (Svizra)
- 2020 – Nino Schurter (Svizra) / Lars Forster (Svizra)
- 2019 – Fabian Rabensteiner (Italia) / Michele Casagrande (Italia)
- 2018 – Matthias Stirnemann (Svizra) / Andri Frischknecht (Svizra)
- 2017 – Daniel Geismayr (Austria) / Jochen Käss (Germania)
- 2016 – Lukas Flückiger (Svizra) / Reto Indergand (Svizra)
- 2015 – Mathias Flückiger (Svizra) / Lukas Buchli (Svizra)
- 2014 – Lukas Buchli (Svizra) / Mathias Flückiger (Svizra)
Dunnas:
- 2023 – Vera Looser (Namibia) / Kimberley Le Court (Mauritius)
- 2022 – Bettina Janas (Germania) / Adelheid Morath (Germania)
- 2021 – Ariane Lüthi (Svizra) / Robyn de Groot (Africa dal Sid)
- 2020 – Haley Batten (Stadis Unids) / Annika Langvad (Danemarc)
- 2019 – Adelheid Morath (Germania) / Bettina Janas (Germania)
- 2018 – Haley Smith (Canada) / Catharine Pendrel (Canada)
- 2017 – Esther Süss (Svizra) / Jennie Stenerhag (Svezia)
- 2016 – Jolanda Neff (Svizra) / Alessandra Keller (Svizra)
- 2015 – Adelheid Morath (Germania) / Sally Bigham (Gronda Bretagna)
- 2014 – Annika Langvad (Danemarc) / Ariane Kleinhans (Africa dal Sid)
![etappas Swiss Epic 2024](https://www.rtr.ch/static/cms/images/960w/ec1c42.jpg)