Durant las proximas emnas stat il ballape da las dunnas en il focus d'interess al campiunadi europeic en l'Engalterra. Natiralmain vul era la Svizra far furora en la terra-mamma dal ballape. Cun Livia Peng (Domat) e Seraina Friedli (La Punt-Chamues-ch) èn era duas Grischunas en il cader svizzer. Friedli è golia numera 2 e Peng la numera 3 davos la rutinada Gaëlle Thalmann.
«I na dat nagins pleds per descriver questa onur»
Seraina Friedli ch'ha dà fin oz 10 gieus per la naziunala svizra è, suenter il 2017, per la segunda giada da la partida ad in campiunadi europeic. Il plaschair dad esser part dal cader svizzer è natiralmain grond. E natiralmain siemia ella era dad esser sin il plaz durant l'Euro. Ma la repartiziun da las rollas è atgnamain clera. Ellas sajan in team da golias e mintgina haja sia rolla, di Seraina Friedli. Sche l'Engiadinaisa vegn dentant duvrada, saja ella pronta.
Buna reclama per sasez ha Seraina Friedli fatg en l'ultim gieu da test avant in'emna cunter l'Engalterra. Tar la terrada da 0:4 è ella stada cun distanza la meglra svizra sin il plaz.
La Svizra na tutga betg tar las favuritas
La Svizra è actualmain il numer 20 dal mund e frunta en sia gruppa sin la Svezia (2), l'Ollanda (4) ed il Portugal (30). I fiss pia ina surpraisa sch'i dumagnassan da surpassar la fasa da gruppa. Er èn ils ultims gieus da test cunter la Germania e l'Engalterra èn las limitas vegnidas demussadas a la naziunala svizra. Omaduas partidas ha la Svizra pers cler.
Ina topfavurita per il titel na datti betg. I dettia pliras naziuns ch'hajan las qualitads da gudagnar il turnier, manegia Gianna Klucker da Tumein ch'ha analisà las equipas per RTR. Sche la giugadura dal FC Rapperswil-Jona (NLA) stoppia numnar in'equipa ch'è per ella la favurita, saja quai la Frantscha. Ellas hajan pliras giugaduras che dattan a Lyon, ch'han gist gudagnà la Champions League. Ma era naziuns sco la Spagna, l'Engalterra, la Svezia u la Germania vegnian segir ad avair in pled en chapitel per il titel a questa Euro 2022.
Gianna Klucker quinta ch'i vegnia ina gronda festa da ballape. Plirs gieus èn gia vendids ora, per exempel tut ils gieus da l'Engalterra. Il nivel dal ballape da dunnas è creschì ils ultims onns, perquai spera ella era sin buna reclama durant las proximas emnas.
