Annik Kälin na porta l'onn 2023 sportivamain nagina fortuna. La grischuna da 23 onns rumpa giu il heptatlon, pia la concurrenza da set disciplinas, al campiunadi mundial a Budapest, quai suenter duas disciplinas per motivs da sanadad.
Bain è Kälin currida sur 100 meters obstachels, l'emprima disciplina, cun 13,36 secundas la meglra prestaziun da la stagiun, dentant èsi vegnì nair davant egl ad ella vers la fin da la cursa. Il sigl en aut ha ella rut giu suenter in'emprova fallada sur l'autezza da 1,74 meters. 1,71 meters aveva ella dumagnà.
Silsuenter ha ella laschà intercurir il medi ed è vegnida tar la decisiun da betg cuntinuar la concurrenza da la saira. «Jau ma sent flaivla e sent sintoms d’ina malsogna. Sut questas circumstanzas na sun jau betg abla da cuntanscher in resultat che correspunda a mias ideas e jau na vi betg ristgar la sanadad», ha la terza dals campiunadis europeics dal davos onn, e sisavla als campiunadis mundials laschà citar.
Kälin ha vulì absolver a Budapest ses emprim heptatlon da la stagiun. In tal n'era avant betg stà pussaivel pervi d'ina fractura da stress en l'oss dal ventrigl sanester. Las dolurs han entschet la fin da mars, in mais pli tard ha ella gì la diagnosa definitiva. Avant il campiunadi mundial è ella sa preschentada en ina buna furma, tar il meeting a Berna è ella restada en il sigl en lung cun 6,65 meters sulettamain per otg centimeters sut sia meglra prestaziun. Uss è suandada la proxima rebattida.