El è 197 cm gronds, paisa 160 kilos, porta il numer 68 e dat gia dapi bun 10 onns tar ils Calanda Broncos, l’equipa grischuna che dominescha dapi dus decennis il sport d’american football en Svizra.
Michel Derungs – il numer 68 dals Calanda Broncos
Michel Derungs ha 28 onns, è da Flond e lavura sin bajetg, quai sco manischunz da las maschinas grondas sco baggers u menzi mucks. Dasperas va Michel Derungs er gugent cun skis e cun töf.
Per mai èn ils Calanda Broncos daventads ina famiglia ed jau hai grond plaschair ch’jau dastg giugar per els onn per onn.
Sia posiziun tar ils Calanda Broncos è en la «offensive line». Ses pensum è uschia da proteger il quarterback, il pli impurtant giugader sin il plaz. Michel Derungs guarda uschia da dustar ord via ils adversaris ch’emprovan dad ir tar il quarterback dals Broncos per che quel haja temp da crear ina bun’acziun, currer enavant u dar in pass decisiv che maina a puncts, sche pussibel ad in touchdown en il cas optimal.
Cun nov schlantsch en la nova stagiun
En vista a la nova stagiun hai dà baininqual midada en l’equipa dals Calanda Broncos. Bleras pitgas e giugaders rutinads ch’han dà 10 onns e dapli per ils Broncos han terminà lur carrieras. Uschia è ì a perder blera rutina ed in grond knowhow. Il scheftrenader american, Geoff Buffum è tuttina da buna speranza ch’ils Broncos gudognan er il 2024 il titel da campiun svizzer, quai cun in’equipa ch'è in bun tant pli giuvna ch’ils davos onns. Ina roschada hai er dà sin la posiziun dal quarterback. Qua gioga da nov Robin Sennrich da Cuira. E quai è ina vaira raritad ch’in Svizzer, gie schizunt in indigen dat sin questa posiziun centrala. Normalmain è quella posiziun adina reservada per in giugader ester, il pli savens d’in American.
Calanda Broncos – il campiun da record
L’equipa grischuna d’american football dominescha dapi bun 20 onns quella scena en Svizra. Cun 12 titels da campiun svizzer tegnan ils Broncos er il record avant ils Zürich Renegades cun 7 titels. Cunzunt dapi il 2009 n’èn ils Calanda Broncos betg stads da franà. Quels davos 15 onns han ils Grischuns adina cuntanschi il final. 11 da 14 finals han ils Broncos gudagnà. Il 2020 era il campiunadi vegnì interrut pervia da la pandemia da Corona. L’onn passà han ils Broncos battì en il final, l’uschenumnà Swissbowl, ils Thun Tigers cun 53:21.
Plan da gieu stagiun 2024
La nova stagiun ha cumenzà bain per ils Calanda Broncos la dumengia, ils 24 da mars en il stadion da la Obere Au a Cuira. Cunter ils Winterthur Warriors han els gudagnà cun 21:3.