Ils Kansas City Chiefs han defendì lur titel e gudagnà per la quarta giada il Super Bowl, pia il final da la National Football League. L'equipa enturn il quarterback Patrick Mahomes ha gudagnà cunter ils San Francisco 49ers cun 25:22 suenter prolungaziun. Be paucas secundas avant la fin dal temp da gieu regular han ils Kansas City Chiefs pudì egualisar. Per ils Chiefs èsi stà il terz titel entaifer tschintg onns.
Occurrenza mediala
La partida ha gì lieu davant 65'000 aspectaturas ed aspectaturs a Las Vegas, tranter els persunas prominentas sco Leonardo DiCaprio, Lady Gaga, Beyoncé ubain Taylor Swift.
Il Super Bowl è surtut er ina gronda occurrenza mediala. En ils Stadis unids guardan mintg'onn passa 100 milliuns persunas il gieu – tar var 330 milliuns abitants. Sin tut il mund spetgan ins cun bunamain 800 milliuns aspectaturas ed aspectaturs.
Or da l'archiv
Il Super Bowl vegn guardà adina pli savens sin tut il mund, uschia er tar nus. Radio RTR aveva per exempel rapportà davart il trenader dals Calanda Broncos e co ch'els guardan il gieu.
