Larissa Gasser: campiunadis mundials a chasa è il pli bel per mai

Ils campiunadis mundials da freestyle en Engiadin’Ota furman la finiziun da questa stagiun d’enviern cun las cursas tranter ils 17 e 30 da mars. Ferm quint dad esser da la partida sco atleta fa er Larissa Gasser da Madulain. La snowboardista ch'è en il cader A da Swiss Ski, cumbatta fin l’ultim di per ina da las quatter plazzas da partenza che stattan a disposiziun tar las dunnas. La decisiun vegnia tratga pir l’ultim mument. Il plaschair da pudair cumbatter per medaglias sin la Corviglia sur San Murezzan en il medem lieu nua ch’ella è stada l’emprima giada cun tschintg onns sin l’aissa, la fetschia in plaschairun.