L'atmosfera en l'Ospital da la Crusch è stada buna e ruassaivla. Ils geniturs sajan stads cuntents ch'els hajan pudì laschar vaccinar lur uffants cunter il coronavirus, di la media d'uffants e giuvenils Heidi Zinggeler Fuhrer.
Recumandaziun per tuts uffants
Gia avant la sonda passada ha Heidi Zinggeler Fuhrer survegnì blers telefons da geniturs che han vulì savair si'opiniun davart il vaccin. Damai ch'il vaccin da Pfizer/BioNTech per uffants è lubì da Swissmedic, sa tegna Heidi Zinggeler Fuhrer era vid la recumandaziun uffiziala. Uschia pon uffants cun malsognas cronicas u che han contact cun persunas da ristga che na pon betg sa laschar vaccinar, laschar dar la squitta. Ma era per uffants sauns cusseglian la Cumissiun federala per vaccinaziuns e l'Uffizi federal da sanadad BAG la vaccinaziun. Quai malgrà ch'uffants n'èn strusch pertutgads d'in grev decurs dal coronavirus.
Motivs fitg differents
Heidi Zinggeler Fuhrer declera ils motivs daco ch'era uffants sauns han sa laschà vaccinar. D'ina vart na san ins betg tge effects a lunga vista ch'il coronavirus po avair, e da l'autra vart era pervia da la quarantina:
Per exempel è ina mamma ch'educhescha persula ils uffants, dependenta da la lavur e na sa betg mintga giada star a chasa sch'in da ses uffants sto star en quarantina. E quai po schabegiar pliras giadas sch'els han gì contact cun ina persuna testada positiva.
Mintgin po decider sez
Heidi Zinggeler Fuhrer ha dentant era chapientscha per quels e quellas che na laschan betg vaccinar lur uffants. Damai ch'i na dat betg in obligatori da vaccinar, po mintgin decider sez. Impurtant saja tenor ella, ch'ins integrescha l'uffant uschè bain sco pussaivel en la decisiun. La dunna ch'è dapi 29 onns media manegia, ch'in uffant dad otg fin diesch onns ch'è bain sviluppà, po segiramain era avair in'opiniun tar quest tema.
