Davent dals onns 90 saja il giavisch da quietar il traffic entaifer las vischnancas adina creschì pli fitg. Il schef da tecnica da la polizia stradala dal Grischun, Curdegn Wasescha, ha persequità il svilup davent da l'entschatta da las zonas da tempo 30. L'acceptanza da la populaziun saja adina vegnida pli gronda.
Il pensar da la glieud saja sa midà. Al cumenzament sajan ins era stà pli restrictiv cun lubir zonas cun tempo reducì, quai saja dentant sa midà. Per il mument datti 68 vischnancas en il Grischun ch'han ina zona da tempo 30, otg dumondas per introducir ina zona cun tempo reducì èn anc tar il chantun.
Domat cuntent cun zona da tempo 30
La via chantunala tras Domat è frequentada fermamain. Perquai ch'igl è per part fitg stretg ed i na dat betg bler spazi sin il passape, vala schon prest in onn dal Coop fin la Crusch‘alva tempo 30. Ils da Domat paran dad esser cuntents cun questa schliaziun. Daniel Meyer, schef dal departament per ambient e segirtad da Domat, conferma ch'i n'haja betg dà grond cuntervent da la populaziun.
Er cun dumandar la glieud sin via paran abitantas ed abitants da Domat d'esser cuntents cun la soluziun.
A mi plascha la zona 30, deplorablamain na sa tegnan betg tuts vidlonder.
Ils peduns a Domat èn cuntents cun la zona da 30 da la via chantunala. Quai portia dapli segirezza per ils peduns. Ils automobilist e las automobilistas stoppian prender dapli resguard in sin l'auter. Gist per glieud pli veglia saja quai ina buna chaussa. La canera saja sa reducida. I vegn dentant era remartgà, ch'ils automobilists na sa tegnian betg vid la limita da 30 km/h. Inqual propona perfin tempo 30 en l'entir vitg.
Tempo 30 er a Glion
Cura che tempo 30 vegn introducì a Glion sin l'entir intschess da la citad, n'è anc betg cler. La populaziun vegn orientada davart ils detagls pir insacur il schaner. Mo gia ussa han umens e dunnas da fatschenta da Glion dà pled e fatg.
- Tempo 30 sco tal saja nagin problem.
- Cun tempo 30 vegn era precedenza da dretg, quai na plascha betg a tuts.
- Forsa guntgeschia la glieud las vias da tempo 30, quai na fissia betg bun per la citad da Glion.
