Il festival digital al teater da Cuira è in project da transfurmaziun cun sustegn dal chantun e la Confederaziun. Il dramaturg digital Yves Regenass ha mess ensemen il program per quels quatter dis. Las producziuns che nizzegian digitalitad sco strategia artistica sajan la «crème de la crème» dal teater digital, di il directur dal teater Cuira Roman Weishaupt. Il focus è per ina sin novas experientschas e spazis da raquintar, e mussa er co che la moda da lavurar dals teatrists sa mida en il temp digital. Las producziuns cun aventuras digitalas han lieu en tuttas localitads dal teater Cuira. Auters projects han lieu online. Uschia possian persunas enturn l'entir globus prender part dals «DigiDays».
Realitad virtuala e roboters
Entamez il foyer dal teater Cuira è installà in cubus da lain cun ina chombra. Cun egliers da virtual reality po l'aspectatur far ina spassegiada multidimensiunala sin ils 16 meters quadrat. «Flintrige/Der Mensch erscheint im Holodeck» sa basa sin in classicher da Max Frisch.
Sin la tribuna da la sala da teater datti da vesair «Nessun Dorma». Ma betg l'opera classica, mabain in toc da teater musical extraordinari cun dus roboters sco protagonists. In'istorgia d'amur cun il roboter d'industria «Akra» che charezza arias da la mort ed il roboter da schubregiar «Putzini». Sco ch'i tutga tar in'opera dramatica vesa l'aspectatur co ch'ils protagonists aman e pateschan sin tribuna.
