Questas dumondas sa il redactur dad SRF Jürg Tschirren respunder. El è redactur en chaussas digitalas e sa confundì cun questa nova intelligenza artifiziala.
Tge è questa Meta AI precis e co funcziuna ella?
Meta IA è sco ChatGPT in uschenumnà grond model da lingua. Il model tar Whatsapp, Instagram e Facebook n’è betg il pli modern, ma in dals pli effizients da Meta. El funcziuna sco tut ils models linguistics che vegnan trenads cun fitg bleras datas. Uschia sa el co che la lingua umana funcziuna e tge pled che suonda il pli bain sin quel avant. Igl è atgnamain ina maschina statistica che determinescha tenor probabilitads tge che correspunda sco resposta ad ina dumonda. En ils Stadis Unids datti quest intelligenza artifiziala gia dapi il 2023. En l’Europa ha l’UE negozià cun Meta reglas pli strictas per la protecziun da datas, perquai ha Meta IA in pau pli paucas funcziuns en l’Europa.
Tge po questa intelligenza artifiziala sin Whatsapp, Instagram e Facebook tut far?
Ella po respunder a dumondas sco er autras intelligenzas artifizialas sumegliantas. Ella po far lavur da retschertga e generar maletgs. Cunzunt cun quests maletgs fa Meta reclama. Ins po per exempel dir: «T’imaginescha che jau saja in supererox», trametter in maletg e l’IA manipulescha lura quel correspundentamain. Sin Whatsapp po l’IA era vegnir envidada en in chat. Ella vesa tge ch’è vegnì scrit e sa or da datas da trenament co che respostas umanas funcziunan e fa uschia propostas tge ch’ins pudess scriver.
Dapli dal tema
Sin Whatsapp èn messadis normalmain codads uschia cha Meta na po betg da leger quels. Sa mida insatge, sch'ina IA è d’enturn?
Gea, la codaziun n’è lura betg pli dada. Codar ils messadis vul dir che be las persunas en in chat vesan tge che vegn scrit. Vul dir che Meta n’ha betg access a las datas or dal chat. Ils messadis van d’ina persuna a l’autra senza che Meta survegn insatge. Sche l’IA duai ussa dentant dar ina resposta, sto ella natiralmain savair tge ch’è vegnì scrit e legia uschia ils chats. Sch’ins cloma pia l’IA en in chat cun «@Meta AI», lura legia ella er ils chats (en Svizra n’è la funcziun anc betg activa).
Ma pertge na ma dumonda nagin, sche jau veglia insumma l'IA?
Sche la glieud vegniss dumandada, sch’ella vul quai, schessan fitg blers na. Ma Meta vul gea che uschè bleras persunas sco pussaivel fetschian tests cun questa app. Perquai vegn quest IA installada a las utilisadras ed als utilisaders simplamain senza dumandar sin il telefonin. Uschia cuntanscha Meta bler dapli utilisaders.
Co utilisesch jau il meglier la Meta IA e co vegn jau puspè liber da questa IA?
L’intelligenza artifiziala na sa lascha betg stizzar, ella è sin l’apparat. Ils decurs dals chats pon vegnir stizzads, ma l’IA betg. Ins sto pia guardar che l’IA na rimnia betg memia bleras datas dad ins. Pertge Meta è ina interpresa spezialisada oravant tut sin rimnar las datas da persunas per pudair crear reclama persunalisada. L'IA da Meta funcziuna sco ina sort ami virtual, al qual ins affida forsa era ina giada chaussas ch’ins na schess betg en la publicitad. Ma quest ami virtual è in che raquinta immediat tut vinavant a Meta. Ins sto pia far adatg tge ch’ins scriva a quest IA e star attent, tge datas ch’ins surdat a la maschina.