La refurma saja necessaria ed urgenta, per che la situaziun finanziala da l'AVS na vegnia betg mendra, han numnà ils represchentants dal comité sco argument principal. Tar il barometer dals quitads da la populaziun saja la tematica adina en ils top trais. Il cumpromiss ch'il parlament ha deliberà la fin dal 2021 saja favuraivel per tut las generaziuns, senza engrevgiar ils custs da la lavur. El resguardia era las consequenzas per las dunnas, nua che la vegliadetgna da retrair AVS vegn auzada. Quai cun ina schliaziun transitorica. Aifer la AVS saja la schliaziun gista e l'egualitad mantegnida, argumentescha il comité. Umens e dunnas survegnian la medema renta.
Part dal comité naziunal per la refurma da l'assicuranza per vegls e survivents (AVS) fan part la Partida populara svizra (PPS), l'Allianza dal Center (ADC) , la Partida liberaldemocratica svizra (PLD), la Partida verd-liberala (PVL) e la partida evangelica svizra (PEV).
La renta na vegn betg reducida. L'assicuranza sociala vegn pli flexibla.
Era cun l'augment da la taglia sin la plivalur contribueschia in e scadin al support per l'AVS. Ils dus projects da votaziun èn colliads in cun l'auter. La refurma po vegnir realisada mo, sche la populaziun accepta omadus projects. Ils davos onns èn tuttas stentas per stabilisar l'AVS restadas maculatura. La davosa refurma gronda è stada l'onn 1997. Experts quintan che l'AVS scriva cifras cotschnas a partir dal 2029, sch'i na capita nagut.
La refurma va en votaziuns ils 25 da settember 2022.
Sin in clic tut davart las votaziuns dals 25 da settember.