Votaziuns 25-11-2018
-
Cussegl federal: NA ad iniziativa d’autodeterminaziun
L’iniziativa mettia en privel contracts internaziunals ed indebleschia uschia la Svizra argumentescha il Cussegl federal.
Quai scriva il Departament federal da giustia e polizia EJPD il mardi en ina communicaziun a las medias.
Autor:
SDA / Isabelle Jaeger
25.09.2018, 01:11
Il mardi suentermezdi ha il Cussegl federal lantschà en ina communicaziun a las medias sia posiziun envers l’iniziativa d’autodeterminaziun
L’iniziativa metta en privel il model da success svizzer
La Svizra saja avisada sin stabilitad e reliabilitad. Perquai recumondian tant il parlament sco er il Cussegl federal al suveran svizzer ils 25 da november 2018 in NA a l’iniziativa d’autodeterminaziun:
L’iniziativa ristga contracts internaziunals, porta gronda malsegirezza legala e periclitescha uschia la Svizra sco plazza economica. Er la protecziun dals dretgs umans vegn indeblida.
Anzi – l’iniziativa gnanc portia dapli autodeterminaziun: Gia uss decidia la Svizra sez tgenins contracts ch’ella vul e tgenins betg.
L'iniziativa da l'autodeterminaziun è vegnida lantschada da la PPS. Cun sia iniziativa vul la PPS metter dretg naziunal sur dretg internaziunal.
Tge che l'iniziativa pretenda
Avrir la box
Serrar la box
Cun l'iniziativa d'autodeterminaziun («Schweizer Recht statt fremde Richter») vul la Partida populara svizra PPS metter dretg svizzer sur dretg internaziunal: Uschia duai la Constituziun federala valair en mintga cas avant il dretg internaziunal ed è da resguardar avant lez. Excepziun fissan sulettamain las definiziuns obligantas dal dretg internaziunal.
Tar in conflict stuessan la Confederaziun ed ils chantuns adattar ils contracts dal dretg internaziunal a las prescripziuns da la Constituziun federala. Sche las contractivas giessan da la glatscha giu stuess il contract che cuntrafa a la Constituziun vegnir visà. Obligaziuns dal dretg internaziunal che cuntrafan a la constituziun na pudess la Confederaziun betg pli surpigliar u acceptar.
RR novitads 16:00+