Avant otg onns ha l'uniun da las senioras svizras inoltrà per l’emprima giada in plant tar la Confederaziun. Quest mardi ha la dretgira a Strasbourg prendì ina sentenzia istorica: La Svizra ha violà ils dretgs umans en dumondas dal clima. La sentenzia pudess esser in cas da precedenza per ulteriurs plants en connex cun il clima.
Organisaziuns pon far recurs
Il Tribunal europeic è vegnì a la conclusiun en sia sentenzia communitgada – che l’uniun saja admessa da far recurs, dentant betg las quatter accusadras singulas.
Tenor il Tribunal europeic lubeschia la midada dal clima, che pertutgia tuts sin il mund, da lubir recurs dad organisaziuns ch'èn activas en dumondas dal clima. Lur finamira stoppia esser da proteger lur commembers e commembras da las consequenzas da la midada dal clima.
Che la dretgira na s'occupia betg dal recurs da las accusadras singulas ha declerà la chombra gronda dal Tribunal europeic cun il fatg – che persunas singulas ston inditgar concretamain lur uschenumnà status d'unfrenda areguard l'inactivitad d'in stadi.
Svizra avess stuì s'occupar dal recurs
La chombra gronda ha sentenzià la Svizra pervi da la violaziun da l’artitgel 8 (dretg da respectar la vita privata e da famiglia) e 6 (dretg sin ina procedura faira). Ils stadis hajan l'obligaziun da realisar mesiras cunter il stgaudament dal clima.
La dretgira ha vinavant constatà che la Svizra n'haja betg preschentà arguments suffizients e persvadents, daco ch'ella n'haja betg vulì s'occupar dal recurs da l'uniun da las senioras dal clima.
«Victoria per tut las generaziuns»
La victoria da las senioras dal clima è tenor l'uniun per la protecziun da l'ambient WWF in success per tut las generaziuns. I saja in cas da precedenza, ha scrit WWF Svizra sin X:
Las reacziuns èn multifaras
La politica en Svizra reagescha a moda fitg differenta sin la sentenzia da Strasbourg. Las partidas cotschen-verdas beneventan quella. La presidenta dals Verds Lisa Mazzone di, ch’il dretg per in ambient saun saja tenor la sentenzia in dretg fundamental – e la copresidenta dals socialdemocrats Mattea Meyer discurra d'ina schleppa per il Cussegl federal.
Tut auter tuni tar la PLD, l'Allianza dal Center e la PPS. Per la partida populara è la sentenzia inacceptabla, la Svizra stoppia extrar dal Cussegl da l’Europa. Per il cusseglier naziunal liberal Christian Wasserfallen è la sentenzia dal tut nunchapibla. Ed il cusseglier naziunal da l’AdC Nicolò Paganini di, ch’il sistem politic svizzer na prevesia betg che derschaders midian decisiuns a l’urna. Quai en connex cun il Na dal suveran svizzer per ina lescha da CO2 pli severa.
Surstada da la sentenzia cunter la Svizra è la presidenta da la Confederaziun Viola Amherd. Ella saja spanegiada da leger ils detagls da la sentenzia – suenter vegnia ella a prender posiziun.
Emprim plant da clima
Per l'emprima giada ha il Tribunal europeic a Strasbourg tractà in cas nua ch'i va per la dumonda, sche la politica dal clima d'in stadi violeschia ils dretgs umans. Questa decisiun pudess uschia er avair consequenzas vastas per l'Europa. I pudess vegnir stgaffì ina via giudiziala co persunas singulas pon purtar plant cunter la politica dal clima dals 46 stadis dal cussegl d'Europa. L'interess dad activists ed activistas da l'ambient per questa sentenzia è stà fitg grond.
L'uniun da las senioras dal clima dumbra radund 2'000 pensiunarias. L'iniziativa per il plant è vegnida da l'organisaziun d'ambient Greenpeace. I sa tracta d'ina procedura strategica, quai ch'è dal tuttafatg usità per activistas ed activists.
