A partir da l'emna proxima pon ins cumprar ina vignetta per vias naziunalas er en la rait. L'Uffizi federal da la duana e da la segirezza dals cunfin ha stgaffì in portal per quai. Cumprar pon ins la vignetta sin www.e-vignette.ch, scriva l'uffizi. Ins na sto betg inditgar las persunalias, dentant il tip ed il numer d'auto.
La vignetta da tatgar na svanescha dentant betg: Quella po vinavant vegnir cumprada sco alternativa. Ella custa er vinavant 40 francs ed er il spazi da temp ch'ella vala resta. Il parlament ha decis ch'i na vegn betg pli a dar in tatgader, uschè svelt che dapli che 90% da las vignettas èn electronicas.
Cuntrari a la vignetta da tatgar n’è la vignetta electronica betg pli colliada cun l’auto, mabain cun il numer da l’auto u dal moto. Da quai profiteschan pia er persunas ch’han in numer da controlla midaivel u che cumpran in auter auto durant l’onn.
