Era la SBB sezza n'è betg cuntenta cun questa situaziun «Nus chapin che quai n'è betg ideal per noss clients e nus ans perstgisain per quai», ha ditg la pledadra da medias da la SBB Sabrina Schellenberg. Introducir in nov sistem da cudeschar saja cumplitgà, uschia Schellenberg, perquai sa focusseschia la SBB l'emprim da pudair porscher las pli impurtantas purschidas. «Quai è la vendita da bigliets e reservaziuns da plazs per viagiaturas e viagiaturs. En in proxim pass vegnan lura anc ils bigliets da velo vitiers.» Quant ditg che quai va, na possian ins il mument anc betg dir.
Cumprar ils bigliets tar la viafier partenaria en l'exteriur
La SBB speria ch'i possian a partir da l'atun puspè vender bigliets per velos. Fin lura recumonda la viafier federala da cumprar ils bigliets da velo sco er quels da passagiers tar la viafier partenaria en l'exteriur. «Tar intgins trens èsi be pussaivel da cumprar bigliets per velos ensemen cun bigliets da passagiers», declara Schellenberg. Concret munta quai: tgi che vul ir cun il velo en l'Italia, sto cumprar ils bigliets tar Trenitalia. Tgi che vul ir a la Mar dal Nord, cumpra ils bigliets tar la Deutsche Bahn.